معرکہ حق میں پاکستان نے ایک ہزار بھارتی فوجی مارے، حنیف عباسی کا دعویٰ

بھارت نے پاکستان کو کمزور سمجھ کر بہت بڑی غلطی کردی، بھارت اب دوبارہ پاکستان کی طرف میلی آنکھ سے دیکھنے کی جرأت نہیں کرسکتا؛ وفاقی وزیر کا یوم تکبیر کی تقریب سے خطاب

ساجد علی بدھ 28 مئی 2025 17:13

معرکہ حق میں پاکستان نے ایک ہزار بھارتی فوجی مارے، حنیف عباسی کا دعویٰ

راولپنڈی ( اُردو پوائنٹ اخبارتازہ ترین۔ 28 مئی 2025ء ) وفاقی وزیر برائے ریلوے حنیف عباسی نے دعویٰ کیا ہے کہ معرکہ حق کے دوران پاکستان نے ایک ہزار بھارتی فوجی مارے۔ راولپنڈی میں یومِ تکبیر کے موقع پر منعقدہ تقریب سے خطاب کرتے ہوئے انہوں کہا کہ پاکستان نے ناصرف دشمن کے 6 جنگی طیارے گرائے بلکہ اس کے ساتھ ایک ہزار بھارتی فوجی بھی ہلاک کیے، جس کے بعد بھارت اب دوبارہ پاکستان کی طرف میلی آنکھ سے دیکھنے کی جرأت نہیں کرسکتا۔

حنیف عباسی کہتے ہیں کہ بھارت نے جب پاکستان پر جنگ مسلط کی تو معصوم بچوں کو بھی شہید کیا گیا لیکن بھارت نے پاکستان کو کمزور سمجھ کر بہت بڑی غلطی کردی، جس کے بعد پاک فضائیہ نے مودی کی غلط فہمی کو رافیل طیارے گرا کر دور کر دیا، اس کامیابی کے بعد پاکستان ایک مضبوط ایٹمی طاقت کے طور پر ابھرا ہے اور دشمن کو ہماری طاقت کا بھرپور اندازہ ہو چکا ہے۔

(جاری ہے)

اس موقع پر پنجاب کی سینئر صوبائی وزیر مریم اورنگزیب نے کہا کہ 1998 میں عالمی دباؤ، معاشی دھمکیاں اور سیاسی دباؤ سمیت سب کچھ میاں محمد نواز شریف کے سامنے رکھا گیا لیکن وہ جھکے نہیں، دشمن کے ایٹمی تکبر کا جواب پاکستان کے ایٹمی طاقت بننے کی صورت میں دیا اور یوں ملک کا دفاع ناقابل تسخیر بنا دیا، نواز شریف نے ایٹمی دھماکے کرکے قوم کے خواب کو حقیقت میں بدلا، پاک افواج نے حالیہ بھارتی جارحیت کا منہ توڑ جواب دیا اور پلوامہ واقعے پر بھارت کوئی ثبوت پیش نہ کرسکا۔

اسی طرح مسلم لیگ ن کے ایک اور رہنما دانیال چوہدری نے تقریب سے خطاب کرتے ہوئے کہا کہ یہ دن ہمارے لیے فخر، اتحاد اور ثابت قدمی کی علامت ہے، یومِ تکبیر پر پاکستانی سائنسدانوں کو سلام پیش کرتے ہیں کیوں کہ یہ دن پاکستان کی سیاسی، سائنسی اور عسکری قیادت کے پختہ عزم کا مظہر ہے۔