Live Updates

بیرسٹر سلطان نے سفارتی سطح پر مسئلہ کشمیر کے حل ،مقبوضہ کشمیر میں جاری بھار تی انسانی حقوق پامالی رکوانے کیلئے کوششیں تیز کر دیں

بدھ 28 مئی 2025 18:31

اسلام آباد (اُردو پوائنٹ اخبارتازہ ترین - این این آئی۔ 28 مئی2025ء)صدر آزاد جموں وکشمیربیرسٹر سلطان محمود چوہدری نے سفارتی سطح پر مسئلہ کشمیر کے حل اور مقبوضہ کشمیر میں جاری بھار ت کی طرف سے انسانی حقوق کی پامالی رکوانے کے لئے سفارتی محاذ پر کوششیں تیز کر دیں ۔ اس سلسلے میںاُنہوں نے حالیہ دنوں میں پاکستان میں تعینات یورپی یونین کی سفیر، امریکی سفارتکاروں کے وفد سے بھی ملاقاتیں کیں اور مسئلہ کشمیر کے حل اور مقبوضہ کشمیر میں جاری بھارتی ظلم و بربریت بند کرانے پر زور دیا۔

اس سلسلے میں صدر آزاد جموں وکشمیر بیرسٹر سلطان محمود چوہدری نے آج یہاں ایوان صدر کشمیر ہائوس اسلام آباد میں آسٹریا کی سفیر اینڈریا ویکی سے بھی تفصیلی ملاقات کی۔ صدر آزاد جموں وکشمیر بیرسٹر سلطان محمود چوہدری نے کہا کہ آسٹریا کا انسانی حقوق پر ایک بہترین ٹریک ریکارڈ ہے اس لئے آسٹریا مسئلہ کشمیر کے حل اور مقبوضہ کشمیر میں بھارت کی طرف سے جاری انسانی حقوق کی پامالی رکوانے کے لئے اپنا کردار ادا کرے۔

(جاری ہے)

صدر آزاد جموں وکشمیر بیرسٹر سلطان محمود چوہدری نے کہا کہ آسٹریا کے پاکستان اور بھارت دونوں کے ساتھ یکساں تعلقات ہیں اس لئے آسٹریا اور یورپ کے دیگر ممالک مل کرمسئلہ کشمیر پر پاک بھارت کے درمیان ثالثی کروائے تاکہ جنوبی ایشیاء میں پائیدار امن کا قیام ممکن ہو سکے۔ اسی طرح آسٹریا یورپ کے دیگر ممالک کے ساتھ مل کر اقوام متحدہ کی قراردادوں کے مطابق کشمیری عوام کو اُن کا حق خودارادیت دلانے اور مقبوضہ کشمیر میں جاری انسانی حقوق کی پامالی بند کرانے کے لئے اپنا کردار ادا کرے۔

اس موقع پرآسٹریا کی سفیر مسز اینڈریا ویکی نے پاک بھارت سیز فائر کو خوش آئند قرار دیا اور کہا کہ خطے میںقیام امن کے لئے آسٹریا اپنی کوششیں جاری رکھے گا۔اس موقع پر صدر آزاد جموں وکشمیر بیرسٹر سلطان محمود چوہدری اورآسٹریا کی سفیر مسز اینڈریا ویکی کے درمیان باہمی دلچسپی سمیت دیگر امور پربھی تبادلہ خیال کیا گیا۔