معرکہ حق اور آپریشن بنیان مرصوص کی کامیابی پرچیف جسٹس آزاد جموں و کشمیر جسٹس راجہ سعید اکرم خان کامسلح افواج کو خراج تحسین

مظفرآباد (اُردو پوائنٹ اخبارتازہ ترین - اے پی پی۔ 28 مئی2025ء) چیف جسٹس آزاد جموں و کشمیر جسٹس راجہ سعید اکرم خان نے کہاہے کہ معرکہ حق اور آپریشن بنیان مرصوص کی کامیاب حکمت عملی کے باعث مسلح افواج پاکستان نے 88گھنٹوں کے اندر اندر اپنے بدترین دشمن کو گھٹنے ٹیکنے پر مجبور کر دیا اور چند ہی گھنٹوں میں بھارت کی طاقت کا غرور خاک میں ملا دیا اور دنیا کو بتا دیا کہ مسلح افواج پاکستان وطن عزیز کےدفاع اور سلامتی کی خلاف ورزی کرنے والوں کوہمیشہ نشان عبرت بنائے گی۔

پاک فوج کے سپہ سالار فیلڈ مارشل جنرل سید عاصم منیر فخر پاکستان کے ساتھ ساتھ ائیر مارشل ظہیر احمد بابرکی قیادت میں پاک فضائیہ کے شاہینوں نے کامیاب جنگی حکمت عملی سے آپریشن بنیان مرصوص کو جنگوں کی تاریخ میں ایک نئی جنگی تاریخ کے طور پر لکھوا دیا ہے۔

(جاری ہے)

ایسی جنگ نہ پہلے ہوئی اور نہ آئندہ ہو گی۔اس معرکہ میں شہید ہونے والے شہداء اور ان کا خاندانوں کا رتبہ بہت بڑ ا ہے۔

شہداء کی مائیں اور باپ بھی عظیم لوگ ہیں۔اب وقت آگیا ہے کہ بھارت کے زیر قبضہ مقبوضہ کشمیر آزاد ہو کر پاکستان کا حصہ بنے گا۔ان خیالات کا اظہار انہوں نے گجرات ڈسٹرکٹ بار ایسو سی ایشن اورگجرات ویلفیئر فورم کے زیر اہتمام شہداء معرکہ بنیان مرصوص کے نام اظہار تشکر کے سلسلہ میں جان جان پاکستان کانفرنس سے بحثیت مہمان خصوصی خطاب کرتے ہوئے کیا۔

کانفرنس سے سابق وزیر تعلیم پنجاب میاں عمران مسعود،صدر ڈسٹرکٹ بار گجرات منیر گوندل ایڈووکیٹ،مرزا ادریس انور،وحید الدین نے بھی خطاب کیا ،چیف جسٹس آزاد جموں و کشمیر جسٹس راجہ سعید اکرم خان نے کہا کہ حالیہ پاک بھارت جنگ کے دوران افواج پاکستان نے بھارت کو جو شکست فاش دی ہے اس سے بھارت سخت صدمہ اور قومہ میں چلا گیا ہے اور دنیا بھی پاک فوج کی کامیابی پر حیران ہے۔

انہوں نے کہا کہ اس جنگ میں شامل طیاروں کو اللہ تعالیٰ کی خصوصی مدد حاصل تھی۔جس کے باعث اس جنگ میں مسلمانوں کو فتح نصیب ہوئی۔انہوں نے کہا کہ بھارت غاصب ملک ہےجس نے پاکستان کو کبھی دل سے تسلیم نہیں کیا اور ہمیشہ طاقت کا گھمنڈکرتارہا لیکن پاک فوج نے بھارت کو ایسی شکست دی ہے کہ اس آئندہ نسلیں بھی یاد رکھیں گی۔انہوں نے کہا کہ آج وطن عزیزپر قربان ہونے والے شہداء کے اعزاز میں یہ تقریب احسن اقدام ہے۔

انہوں نے کہا کہ وطن کی حفاظت کے لیے جو لوگ اپنا آج قوم کے مستقبل کے لیے قربان کر دیتے ہیں وہ عظیم لوگ ہیں انہیں کی وجہ سے پوری قوم سکھ کا سانس سوتی ہے۔شہداء کی قربانیاں کوئی عام قربانی نہیں ہے۔اللہ تعالیٰ نے شہداء کی عظمت کا خود ذکر کرتے ہوئے کہا کہ شہداء زندہ ہیں اور انہیں رزق دیا جاتاہے۔