پاکستان سے شرمناک شکست کھانے کے بعد مودی سرکار کے زیر اثر بھارتی میڈیا ٹرمپ کی کردار کشی پر اتر آیا

نئی دہلی(اردوپوائنٹ اخبار تازہ ترین۔29 مئی 2025)پاکستان سے شرمناک شکست کھانے کے بعد بھارت نے ہزیمت چھپانے کیلئے ٹرمپ کی کردار کشی شروع کردی، بھارتی میڈیا نے اپنی خفت مٹانے کیلئے امریکی صدر ڈونلڈ ٹرمپ کو دہشتگردوں کا سرپرست بھی کہا ، بھارتی میڈیا کے مطابق امریکی صدر ٹرمپ کاآئی کیو لیول بھارت کے 7ویں جماعت کے بچے سے بھی کم ہے اور جہاں ٹرمپ جیسے صدر ہوں گے وہاں 11/9 جیسا واقعہ ہونا کوئی بڑی بات نہیں۔

میڈیا رپورٹس کے مطابق مودی سرکار کے زیر اثر بھارتی میڈیا امریکی صدر ڈونلڈ ٹرمپ کی کردار کشی پر اتر آیا ہے اور پاکستانی مسلح افواج کی جانب سے اپنے دفاع میں بھارت کو منہ توڑ جواب دینے پر امریکہ پر تنقید کا سلسلہ شروع کردیاہے۔امریکی صدر ڈونلڈ ٹرمپ کی کوششوں کے بعد سیز فائر ہو گیا تو بھارت نے یوٹرن لے لیا اور اب بھارتی میڈیا جس میں ارناب گوسوامی جیسے مودی کے حمایتی بھرے پڑے ہیں نے امریکی صدر پر تنقید شروع کردی ہے۔

(جاری ہے)

امریکی صدر ڈونلڈ ٹرمپ کو بھارتی میڈیا کے اینکرز نے بغیر نظرئیے کا حامل رہنما قرار دیدیا۔ بھارتی ٹی وی اینکر نے کہا کہ اگر کوئی یہ سمجھتا ہے کہ ٹرمپ کشمیر پر بات کرا دے گا تو ہم بتا دیں ہم اپنا معاملہ دیکھنا جانتے ہیں۔بھارتی میڈیا کا دوغلا پن کھل کر سامنے آ چکا ہے۔ پہلے امریکہ سے سیز فائر کرانے کیلئے بھیک مانگی بعد میں تنقید شروع کردی۔

مودی سرکار کی یہ عادت ہے کہ پہلے بھیک مانگو، پھر الزام تراشی شروع کردو اور بعد میں مکر جاو جب کہ اس بار تو مودی سرکار نے دنیا کے سب سے طاقتور صدر کے ساتھ بھی یہ سب کچھ کردیا اور امریکی صدر ڈونلڈ ٹرمپ کے بیان کو بھارتی میڈیا نے دھوکا اور جھوٹ تک قرار دیدیا۔آپریشن بنیان مرصوص میں پاکستانی مسلح افواج کے جوابی حملے میں بھارت کے رافیل طیارے تباہ ہوئے۔

پاکستانی مسلح افواج کے حملوں سے شمالی بھارت کے70 فیصد علاقے کی بجلی بند ہو گئی۔ پاکستانی فضائیہ نے بھارت کا مہنگا ترین ایس 400 دفاعی نظام تباہ کر دیا۔بھارتی فوج نے جب دیکھا کہ سب کچھ ان کے ہاتھ سے نکل گیا تو مودی سرکار کو امریکا سے رابطے کے لیے کہا۔ بھارت کی جانب سے سیز فائر کیلئے رابطے کے حوالے سے امریکی نشریاتی ادارے سی این این کے رپورٹر نک رابرٹسن نے بھی تصدیق کی ہے۔

پاکستان اور بھارت کے درمیان سیز فائر کی خبر امریکی صدر ڈونلڈ ٹرمپ نے اپنے ایکس اکاونٹ پر جاری کی جس نے بھارتی میڈیا ، سیاست دانوں اور عوام کو سیخ پا کردیا۔مودی سرکار نے جب پاکستانی مسلح افواج سے منہ کی کھائی تو امریکہ سے مدد کی بھیک مانگی اور جب سیز فائر طے پا گیا تو مودی سرکار نے یوٹرن لیتے ہوئے ڈونلڈ ٹرمپ پر تنقید شروع کردی ہے۔بھارتی سیاستدانوں کا بھی کہنا ہے کہ پاکستان اور بھارت کے درمیان سیز فائر کی خبر اب امریکی دھرتی سے جاری کی جائے گی۔ امریکہ کے دباو کے باعث بھارت سیز فائر کر رہا ہے۔ 78 برس سے ہمارا موقف رہا کہ کسی تیسرے ملک کی مداخلت برداشت نہیں کی جائیگی اورآج ٹرمپ ٹوئٹ کرتا ہے اور سیز فائر ہو جاتا ہے۔