Live Updates

احتجاجی تحریک کا اعلان ہوچکا‘ پارٹی لیڈرشپ تیار ہو جائے، عمران خان کی ہدایت

وکٹ کے دونوں جانب کھیلنے کی کسی کو اجازت نہیں دوں گا، اگر کوئی سامنے نہ آیا تو اب میں برداشت نہیں کروں گا؛ سابق وزیراعظم کا سینیٹر علی ظفر کے ذریعے پیغام

ساجد علی جمعرات 29 مئی 2025 16:11

احتجاجی تحریک کا اعلان ہوچکا‘ پارٹی لیڈرشپ تیار ہو جائے، عمران خان ..

راولپنڈی ( اُردو پوائنٹ اخبارتازہ ترین۔ 28 مئی 2025ء ) پاکستان تحریک انصاف کے بانی چیئرمین عمران خان کا کہنا ہے کہ احتجاجی تحریک کا اعلان ہوچکا ہے اس کے لیے پارٹی لیڈرشپ تیار ہو جائے۔ راولپنڈی کی اڈیالہ جیل میں سابق وزیراعظم سے ملاقات کے بعد میڈیا سے گفتگو کرتے ہوئے سینیٹر علی ظفر نے بتایا کہ عمران خان نے کہا ہے احتجاجی تحریک کا اعلان ہوچکا ہے، پارٹی لیڈرشپ موونٹ کے لیے تیار ہو جائے، اگر کوئی سامنے نہ آیا تو اب میں برداشت نہیں کروں گا اور وکٹ کے دونوں جانب کھیلنے کی کسی کو اجازت نہیں دوں گا۔

سینیٹر علی ظفر نے بتایا کہ عمران خان نے یہ بھی کہا ہے کہ پاکستان کے لیے بات چیت کرنے کو تیار ہوں اور پاکستان میں اتحاد کی خاطر مذاکرات کے لیے بھی تیار ہوں، میں صرف انصاف چاہتا ہوں، جس کے لیے میرے کیسز جلد سے جلد سنے جائیں۔

(جاری ہے)

اسی حوالے سے پاکستان تحریک انصاف کے بانی چیئرمین کی ہمشیرہ علیمہ خان کا کہنا ہے کہ ہر روز لوگ ہم سے پوچھتے ہیں کہ عمران خان کو جیل سے کب رہائی ملے گی؟ جواب سادہ ہے کہ عمران خان اس وقت باہر آئیں گے جب عدالتیں ان کے کیسز سنیں گی اور انصاف دیں گی لیکن اس وقت انصاف سے انکار کیا جا رہا ہے، ججز شدید دباؤ میں ہیں۔

ہمارے وکلاء کو عدالت میں اپنے دلائل پیش کرنے کا موقع بھی نہیں دیا جا رہا۔ تاریخوں میں تاخیر ہو رہی ہے۔ سماعتیں مسدود ہیں۔ یہ واجب عمل نہیں ہے، یہ دبائو ہے۔ انہوں نے کہا کہ درجنوں وی لاگز میں خفیہ دوروں، خفیہ ڈیل کی پیشکش، خفیہ مذاکرات، آدھی رات کو خفیہ ملاقاتیوں کے بارے میں روزانہ قیاس آرائیاں ہوتی رہتی ہیں، کچھ ولاگرز کا دعویٰ ہے کہ ملاقاتیں کرنے والے اسٹیبلشمنٹ سے ہیں اور کچھ لوگ دوسری بار بیرون ملک سے آئے ہیں، جب عمران خان نے پاکستان بھر میں ماس موومنٹ کا اعلان کیا تو درجنوں بلاگرز یہ خوشخبری سنارہے ہیں کہ عمران خان کو عید سے پہلے رہا کر دیا جائے گا اور معمول کے مطابق ہمارے بھائی کو عوامی طور پر اس بات سے انکار کرنا پڑتا ہے کہ وہ بتانا پڑتا ہے کہ وہ اپنی رہائی کو محفوظ بنانے کے لیے کسی بھی قسم کا معاہدہ نہیں کر رہے۔