Live Updates

آزاد کشمیر میں دہشتگردی کیلئے افغان سرزمین استعمال ہوئی: آئی جی آزاد کشمیر

گزشتہ روز دہشتگردوں کی موجودگی اطلاع پر پولیس نے حسین کوٹ میں کارروائی کی جس میں 4 دہشتگرد مارے گئے،رانا عبدالجبار

جمعرات 29 مئی 2025 22:57

مظفرآباد(اُردو پوائنٹ اخبارتازہ ترین - این این آئی۔ 29 مئی2025ء)آئی جی آزاد کشمیر رانا عبدالجبار نے کہا ہے کہ آزاد کشمیر میں دہشتگردی کے لیے افغان سرزمین استعمال ہوئی۔پریس کانفرنس کرتے ہوئے آئی جی پولیس آزاد کشمیر نے کہا کہ گزشتہ روز دہشتگردوں کی موجودگی اطلاع پر پولیس نے حسین کوٹ میں کارروائی کی جس دوران دہشتگردوں نے پولیس پر دستی بم اور خودکار ہتھیاروں سے حملہ کیا۔

(جاری ہے)

آئی جی رانا عبدالجبار نے بتایا کہ مقابلے میں فتنہ الخوارج کے مقامی سربراہ زرنوش سمیت 4 دہشتگرد مارے گئے جب کہ مقابلے میں پولیس کے 2 جوان شہید اور 5 زخمی ہوئے۔آئی جی پولیس نے کہا کہ وزیراعظم آزاد کشمیر نے شہید اہل کاروں کے ورثا کیلئے فی کس ایک کروڑ روپے ، زخمی اہلکاروں کو 20، 20 لاکھ روپے دینے کا اعلان کیا ہے۔ آئی جی رانا عبدالجبار نے بتایا کہ دہشتگرد زرنوش آزاد کشمیر میں خوارج کا ٹھکانہ بنارہا تھا، افغانستان فرار ہونے والے دہشتگرد ڈاکٹرعبدالرؤف اورغازی شہزاد دشمن ملک کی پراکسیز بنے ہوئے ہیں، آزاد کشمیر میں دہشتگردی کیلئے افغان سرزمین استعمال ہوئی، حکومت پاکستان کے ذریعے افغانستان کی حکومت کو شواہد مہیا کریں گے۔