آپریشن سندور ابھی ختم نہیں ہوا ہے، مودی نے ایک بار پھر پاکستان کو دھمکی دیدی

انڈیا ہر دہشت گردانہ حملے کا موثر جواب دے گا، پاکستان کسی دھوکے میں نہ رہے، بھارت نے دہشت گردی کے خلاف اپنی لڑائی میں واضح طور پر تین نکات طے کئے ہیں ، بھارتی وزیراعظم کا کانپورمیں تقریب سے خطاب

فیصل علوی جمعہ 30 مئی 2025 17:15

آپریشن سندور ابھی ختم نہیں ہوا ہے، مودی نے ایک بار پھر پاکستان کو دھمکی ..

کانپور(اردوپوائنٹ اخبار تازہ ترین۔30 مئی 2025)بھارتی وزیراعظم مودی نے ایک بار پھر پاکستان کو دھمکی دیدی، آپریشن سندور ابھی ختم نہیں ہوا ہے، انڈیا ہر دہشت گردانہ حملے کا موثر جواب دے گا، پاکستان کسی دھوکے میں نہ رہے،بھارت نے دہشت گردی کے خلاف اپنی لڑائی میں واضح طور پر تین نکات طے کئے ہیں، بھارت کے شہر کانپور میں ترقیاتی منصوبوں کے افتتاح کے دوران سے خطاب کرتے ہوئے نریندر مودی نے کہا کہ دہشت گردانہ حملوں کا وقت، جواب دینے کے طریقہ کار اور اور شرائط ہماری مسلح افواج طے کریں گی۔

نریندر مودی نے ایک بار پھر پاکستان پر دہشت گردی کی سرپرستی کا الزام عائد کیا اور کہا کہ پاکستان کا سٹیٹ ایکٹر اور نان سٹیٹ ایکٹر کا کھیل چلنے والا نہیں ہے۔ دشمن کہیں بھی ہو اسے چھوڑا نہیں جائے گا۔

(جاری ہے)

انڈیا کے وزیر اعظم نریندر مودی نے ایک بار پھر پاکستان کو ہدف بناتے ہوئے کہاکہ بھارت اب ایٹم بم کی گیڈر بھبکی سے نہیں ڈرے گا اور نہ ہی اس کی بنیاد پر کوئی فیصلہ کرے گا۔

یاد رہے کہ اس سے قبل بھی بھارتی وزیراعظم نریندر مودی کا کہنا تھا کہ پاکستانی عوام سے کہتا ہوں سکھ چین کی زندگی جیو، روٹی کھاو، ورنہ میری گولی تو ہے ہی۔بھارتی وزیراعظم نریندر مودی نے اپنی بدحواسی کا مظاہرہ کرتے ہوئے پاکستان کے عوام کو کھلی دھمکی دی تھی۔بھارتی خبر رساں ادارے پریس ٹرسٹ آف انڈیا کے مطابق بھارتی ریاست گجرات کے دورے کے دوران بھوج کیلئے ترقیاتی پیکیج کے اعلان کے دوران جلسے سے خطاب کرتے ہوئے نریندر مودی کا کہنا تھا کہ دہشت گردی پاکستان کو تباہ کر رہی تھی۔

پاکستانی عوام سے اپیل کرتا ہوں کہ وہ دہشت گردی کے خلاف آواز بلند کریں۔مودی کایہ بھی کہنا تھا کہ پاکستان کو آتنک کی بیماری سے مکت کرنے کیلئے پاکستان کے عوام کو آگے آنا ہوگا۔پاکستان کے نوجوانوں کو آگے آنا ہوگا۔ سکھ چین کی زندگی جیو، روٹی کھاو۔ ورنہ میری گولی تو ہے۔ بھارتی وزیراعظم مودی کے ان الفاظ پر بھارتی وزیراعظم کے سامنے بیٹھے افراد نے نعرے لگائے تھے۔

بھارتی وزیراعظم نے سنگین الزام عائدکرتے ہوئے کہا تھا کہ دہشت گردی پاکستان کی حکومت اور فوج کیلئے پیسہ کمانے کا ذریعہ تھا ۔ پاکستانی عوام کو آگے آکر دہشت گردی کا خاتمہ کرنا چاہیے۔ نریندر مودی نے اپنے خطاب میں آپریشن سندور پہلگام حملے کا براہِ راست جواب تھا اور واضح کیا کہ اگر بھارت کو دوبارہ اکسایا گیا تو وہ دہشت گردوں کے ٹھکانوں پر حملہ کرنے سے ہچکچائے گا نہیں۔