وفاقی سیکرٹری وزارت مذہبی امور و بین المذاہب ہم آہنگی ڈاکٹر سید عطا الرحمن کا عازمین کو حج کے دوران پاکستان کی ساکھ برقرار رکھنے کا مشورہ

ہفتہ 31 مئی 2025 15:40

اسلام آباد (اُردو پوائنٹ اخبارتازہ ترین - اے پی پی۔ 31 مئی2025ء) وفاقی سیکرٹری وزارت مذہبی امور و بین المذاہب ہم آہنگی ڈاکٹر سید عطا الرحمن نے عازمین حج کو مشورہ دیا ہے کہ حج کے دوران پاکستان کی ساکھ کو برقرار رکھیں اور سعودی قوانین کی پاسداری کریں ۔ہفتہ کو ریڈیو پاکستان کے ساتھ گفتگو کے دوران سیکرٹری مذہبی امور نے پاکستانی عازمین سے کہا کہ وہ اپنے آپ کو اس انداز میں پیش کریں جس سے حج کے دوران ملک کی ساکھ پر مثبت اثر ات مرتب ہوں۔

انہوں نے اس بات پر زور دیا کہ حکومت پاکستانی حجاج کو ایک مثبت اور یادگار تجربہ فراہم کرنے کے لیے انتھک محنت کر رہی ہے۔ انہوں نے مزید کہا کہ حکومت کے تعاون سے اب یہ پاکستانی حجاج پر منحصر ہے کہ وہ اپنے روحانی سفر پر توجہ دیں اور اخلاص کے ساتھ حج کے ارکان ادا کریں ۔

(جاری ہے)

عازمین حج کی سہولیات میں بہتری کے حالیہ اقدامات پر روشنی ڈالتے ہوئے ڈاکٹر سید عطا الرحمان نے کہا کہ حکومت نے حاجیوں کے لیے سہولیات کو اپ گریڈ کیا ہے، جس میں روایتی گدوں کو صوفہ کم بیڈ سے تبدیل کرنا، ایئر کولرز کے علاوہ ایئر کنڈیشنر لگانا اور آرام کے لیے ایلیویٹڈ سامان سٹوریج ریک اور شزو ریک متعارف کرانا شامل ہے۔

انہوں نے ایامِ مشاعرہ میں حجاج کے فائدے کے لیے منعقد کیے جانے والے شاندار انتظامات کی بھی نشاندہی کی جو ان کے آرام و عافیت کے لیے حکومت کے عزم کو ظاہر کرتے ہیں۔ سیکرٹری مذہبی امور کے مطابق سرکاری سکیم کے تحت 87 ہزار سے زائد عازمین سعودی عرب پہنچ چکے ہیں جب کہ 21 ہزار 984 نے نجی سفر کیا ہے۔ اسلام آباد، کراچی اور لاہور سے آج مزید پانچ پروازیں روانہ ہونے والی ہیں۔