Live Updates

فریضہ حج کو حکمرانوں نے کمائی کا ذریعہ بنا لیا ، حج کو سستا کیا جائے ‘جاوید قصوری

حکومت کی غفلت اور بیوروکریسی کی نا اہلی کی وجہ سے 67ہزار پاکستانی حج سے محروم ہو گئے

اتوار 1 جون 2025 15:25

لاہور (اُردو پوائنٹ اخبارتازہ ترین - این این آئی۔ 01 جون2025ء)امیر جماعت اسلامی پنجاب وسطی محمد جاوید قصوری نے کہا ہے کہ حکومت پاکستان کی غفلت اور بیوروکریسی کی نا اہلی کی وجہ سے امسال 67ہزار پاکستانی حج سے محروم ہو گئے ہیں، افسوس کا مقام یہ ہے کہ حکومت اپنی ذمہ داری قبول کرنے کی بجائے پرائیویٹ ٹور آپریٹرز پر ملبہ ڈالنے کی کوشش کر رہی ہے ،70ارب روپے حاجیوں سے لیکر سعودی عرب منتقل کر دیئے گئے، مگر یہ حاجی فریضہ حج کی ادائیگی کے لئے نہیں جا سکے ۔

انہوں نے کہا کہ پوری دنیا کے اندر مسلم حکومتیں ہوں یا غیر مسلم وہ حاجیوں کو ریلیف فراہم کرتی ہیں لیکن پاکستان میں حکمران حج کو کمائی کا ذریعہ بنا لیتے ہیں۔ہر سال کوئی نہ کوئی اسکینڈل منظر عام پر آتا ہے اور پھر اس کو دبا دیا جاتا ہے ۔

(جاری ہے)

حکومت کی ذمہ داری ہے کہ وہ پرائیویٹ حج آپریٹر کو ریلیف دے ۔انہوں نے کہا کہ عید قربان کی آمد سے قبل ہی مہنگائی کا جن بے قابو ہو چکا ہے، جس کی وجہ سے عام شہری شدید مشکلات کا شکار ہیں۔

پہلے ہی مہنگائی کی چکی میں پسنے والے غریب عوام کے لیے روزمرہ کی اشیائے ضروریہ خریدنا مزید دشوار ہو گیا ہے۔ کھانے پینے کی اشیا ء کی قیمتوں میں بے تحاشا اضافہ ہو گیا ہے۔ آٹا، چینی، گھی، دالیں، سبزیاں اور پھل سب مہنگے ہو چکے ہیں جبکہ انتظامیہ خاموش تماشائی بنی ہوئی ہے۔ ذخیرہ اندوزوں اور ناجائز منافع خوروں کے خلاف فوری کارروائی کرتے ہوئے عام آدمی کو ریلیف فراہم کیا جائے۔

حکومت فوری طور پر مہنگائی کے خلاف اقدامات کرے۔محمد جاوید قصوری نے اس حوالے سے مزید کہا کہ موجودہ حکمرانوں نے ملک و قوم کو بند گلی کی طرف دھکیل دیا ہے۔فارم 47والے پاکستان کودرپیش مشکلات میں اضافہ کر رہے ہیں۔ یوں محسوس ہوتا ہے کہ جیسے کسی کو بھی عوام کے مسائل کے حل سے کوئی غرض نہیں اور نہ ہی قومی سلامتی اور عزت و وقار کی قدر ہے ۔ملکی حالات دن بدن ابتر ہوتے چلے جا رہے ہیں ۔