سمبڑیال الیکشن میں جیت ، عوام کو یقین ہے عوام کو ریلیف ،ملک کو بحرانوں سے صرف (ن) لیگ نکال سکتی ہے‘مریم اورنگزیب

لاہور (اُردو پوائنٹ اخبارتازہ ترین - این این آئی۔ 02 جون2025ء) پاکستان مسلم لیگ (ن) کی مرکزی سیکرٹری اطلاعات اور پنجاب کی سینئر صوبائی وزیر مریم اورنگزیب نے کہا ہے کہ سمبڑیال میں عوام نے نواز شریف کو ووٹ دیا ہے ،عوام کو یقین ہے کہ عوام کو ریلیف اور ملک کو بحرانوں سے صرف نواز شریف کی قیادت میں مسلم لیگ (ن) نکال سکتی ہے ۔ انہوں نے اپنے بیان میں کہا کہ 40فیصد کی مہنگائی کو منفی کرنے والے نواز شریف اور شہباز شریف کو عوام ووٹ دے گی، عوام نے 28مئی اور 10مئی والوں کو ووٹ دیا ہے اور 9مئی والوں کو مسترد کیا ہے الحمدللہ ۔

مریم اورنگزیب نے کہا کہ شہباز شریف نے ملک وقوم کا ہر محاذ پر ساتھ دیا، خدمت کی اور ہر جنگ جیتی ووٹ بھی شہباز شریف کو ہی ملے گا ،معاشی، سفارتی اور دشمن کی جارحانہ جنگ کے خلاف قوم کو جتانے والوں کو ہی ووٹ ملے گا، دشمن کے ساتھ مل کر افواج پاکستان اور شہیدوں کے خلاف مہم چلانے والوں کو ووٹ نہیں ملتے ،ملک کو ڈیفالٹ سے بچانے اور عوام کو ریلیف دینے والوں کو ہی عوام نے ووٹ بھی دیا ہے ۔

(جاری ہے)

انہوں نے کہا کہ پنجاب کو سستی روٹی وزیراعلی مریم نواز دے تو عوام ووٹ بھی مریم نواز کو دے گی ،پنجاب کے نوجوانوں کو سکالرشپ اور لیب ٹاپ مریم نواز دے تو عوام مریم نواز کو ووٹ دے گی ،پنجاب کے کسانوں کو کسان کارڈ ، گرین ٹریکٹر اور جدید آلات مریم نواز دے گی تو عوام مریم نواز کو ووٹ دے گی ،پنجاب کو جدید ہسپتال اور سکول وزیراعلی مریم نواز دے گی تو عوام ووٹ مریم نواز کو دے گی ،پنجاب کو جدید بیسک ہیلتھ اور اور رورل ہیلتھ سینٹرز مریم نواز دے گی تو عوام ووٹ بھی مریم نواز کو دیں گے مپنجاب کو الیکٹرک بسیں مریم نواز دے گی تو عوام مریم نواز کو ووٹ دے گی ۔

انہوں نے کہا کہ پنجاب میں گند تم ڈالو، صاف کرے مریم نواز تو ووٹ بھی مریم نواز کو ہی ملے گا ،تم عوام کی مفت دوائی بند کرو، اور گھر گھر مفت دوائی مریم نواز دے تو عوام ووٹ مریم نواز کو دے گی، پنجاب کو گھر کے کی دہلیز پہ حق وزیراعلی مریم نواز دے تو ووٹ بھی عوام مریم نواز شریف کو دے گی ، پنجاب کو 12000 کلو میٹر کی سڑکیں وزیراعلی پنجاب دے تو ووٹ بھی عوام مریم نواز شریف کو دے گی، گٹر، سیوریج سے نجات، پینے کا صاف پانی مریم نواز دے گی تو عوام ووٹ بھی مریم نواز کو دے گی، نوجوانوں کو لیپ ٹاپ، ہنر، ہونہار سکالرشپ اور روزگار مریم نواز دے تو ووٹ بھی مریم نواز کو ملے گا ۔نوجوانوں کے ہاتھوں میں کیلوں والے ڈنڈے، غلیلیں اور پٹرول بم دینے والوں کو ووٹ نہیں ملتے۔