Live Updates

بلوچستان اسمبلی کی قرارداد جمہوری اقدار کا خیر مقدم کرتے ہیں، پیپلزپارٹی قوم کی ترجمان ہے، شازیہ مری

منگل 3 جون 2025 19:36

اسلام آبا د(اُردو پوائنٹ اخبارتازہ ترین - این این آئی۔ 03 جون2025ء) پاکستان پیپلز پارٹی کی رہنما شازیہ مری نے کہاہے کہ بلوچستان اسمبلی کی قرارداد جمہوری اقدار کا خیر مقدم کرتے ہیں، پیپلزپارٹی قوم کی ترجمان ہے۔ اپنے بیان میںشازیہ مری نے کہاکہ وزیر اعلیٰ بلوچستان اور اراکینِ اسمبلی نے عوامی امنگوں کا ساتھ دیا، بے نظیر بھٹو شہید کا نام صرف ایئرپورٹ نہیں، ایک نظریہ اور جدوجہد کی پہچان ہے۔

انہوںنے کہاکہ محترمہ بے نظیر بھٹو پاکستان کی پہلی خاتون وزیرِ اعظم اور عالمِ اسلام کی پہلی خاتون سربراہِ حکومت تھیں۔ شازیہ مری نے کہاکہ شہید محترمہ نے عالمی سطح پر پاکستان کی مثبت پہچان قائم کرے گا، بلوچستان کے عوام نے بتا دیا کہ شہید بے نظیر بھٹو آج بھی انکے دلوں پر راج کر رہی ہیں۔

(جاری ہے)

شازیہ مری نے کہاکہ شہید محترمہ نے بدترین آمروں کا ڈٹ کر مقابلہ کیا، شازیہ مری ایئرپورٹ کا نام محترمہ بے نظیر بھٹو شہید سے منسوب کرنا پاکستان کی جمہوری جدوجہد کو خراجِ عقیدت ہوگا۔

انہوںنے کہاکہ قومی اسمبلی اور سندھ اسمبلی کے بعد بلوچستان کی قرارداد سے واضح ہو گیا کہ یہ قومی مطالبہ ہے۔ انہوںنے کہاکہ محترمہ بے نظیر بھٹو شہید کی قربانی کو مٹایا نہیں جا سکتا، تاریخ خود گواہ ہے، شہید محترمہ بینظیر بھٹو نے ملک میں جمہوریت کے حصول اور جمہوری اقتدار کیلئے بھرپور جدوجہد کی،شہید بی بی نے پاکستانی قوم کی ترقی اور خوشحالی کو یقینی بنایا۔

انہوںنے کہاکہ شہید بی بی کے نام کو سرکاری سطح پر وہی عزت دی جائے جس کی وہ حقدار ہیں،پوری دنیا میں لیڈرز کے نام پر ایئرپورٹ و دیگر اہم مقامات کے نام رکھے جاتے ہیں۔ شازیہ مری نے کہاکہ قومی رہنماؤں کے ورثے کو مٹانا یا نظرانداز کرنا صرف بھول نہیں، بلکہ ایک خطرناک روش ہے، پیپلزپارٹی شہیدوں کی جماعت ہے، اور ہم اپنے لیڈرز کا وقار ہر صورت بحال رکھیں گے۔انہوںنے کہاکہ وزیر اعظم سے مطالبہ ہے کہ فوری طور پر ایئرپورٹ کا نام محترمہ بے نظیر بھٹو شہید کے نام سے بحال کیا جائے۔