آبی جارحیت پر بھی بھارت کا غرور خاک میں ملائیں گے، بھارت سندھ طاس معاہدے کو بطور ہتھیار استعمال کر رہا ہے، وزیراعظم شہباز شریف

بھارت پانی کی تقسیم کے معاہدے کی خلاف ورزی کو اپنے بیانیے کا حصہ بنا کر دنیا کو گمراہ کرنے کی کوشش کر رہا ہے،بھارت کو حالیہ جنگ میں بدترین شکست ہوئی، بھارت کی پاکستان کا پانی بند کرنے کی دھمکیوں کو دنیا نے مسترد کر دیا، وزیراعظم کا اجلاس سے خطاب

فیصل علوی جمعرات 5 جون 2025 15:40

آبی جارحیت پر بھی بھارت کا غرور خاک میں ملائیں گے، بھارت سندھ طاس معاہدے ..

اسلام آباد(اردوپوائنٹ اخبار تازہ ترین۔05 جون 2025)وزیراعظم شہباز شریف نے کہا ہے کہ آبی جارحیت پر بھی بھارت کا غرور خاک میں ملائیں گے، بھارت سندھ طاس معاہدے کو بطور ہتھیار استعمال کر رہا ہے، بھارت کو حالیہ جنگ میں بدترین شکست ہوئی ، آبی ذخائر پر اجلاس میں گفتگو کرتے ہوئے وزیراعظم کا کہنا ہے کہ بھارت پانی کی تقسیم کے معاہدے کی خلاف ورزی کو اپنے بیانیے کا حصہ بنا کر دنیا کو گمراہ کرنے کی کوشش کر رہا ہے۔

اجلاس میں وزیراعظم نے کہا کہ چاروں صوبوں کے عوام کی پانی کی ضرورت پوری کرنا حکومتی ترجیح ہے۔ پانی کے اپنے حق کو محفوظ بنانا ہم سب کیلئے اجتماعی چیلنج ہے۔حالیہ پاک بھارت جنگ میں اللہ تعالیٰ نے پاکستان کو عظیم فتح عطا کی جس پر جتنا بھی شکر ادا کیا جائے کم ہے۔

(جاری ہے)

ان کا کہنا تھا کہ شکر کا بہترین طریقہ یہی ہے کہ ہم شب و روز محنت کریں اور 24 کروڑ عوام کیلئے معاشی میدان میں روشن مستقبل تشکیل دیں۔

انہوں نے کہا کہ بھارت کی پاکستان کا پانی بند کرنے کی دھمکیوں کو دنیا نے مسترد کر دیا۔ وفاق نے صوبوں کے ساتھ مل کر قوم کو شاندار مستقبل دینا ترتیب ہے، ایسے فیصلے کرنے ہوں گے کہ آئندہ نسلیں فخر کر سکیں۔آبی وسائل کا تحفظ ایک اجتماعی چیلنج ہے جس سے نمٹنے کیلئے فوری اور سنجیدہ اقدامات ناگزیر ہیں۔وزیراعظم نے زور دیا کہ چاروں صوبوں کے عوام کی پانی کی ضروریات پوری کرنا حکومت کی اولین ترجیح ہے اور ہم بھارت کی آبی جارحیت کا جواب بھی اسی جرات و حکمت سے دیں گے جیسے ہم نے روایتی جنگ میں دشمن کے غرور کو خاک میں ملایا۔

وزیراعظم شہباز شریف نے گفتگو کرتے ہوئے مزید کہا کہ پانی تقسیم کے معاہدے کی خلاف ورزی سے متعلق بھارت اپنے بیانیے کو ہوادے رہا ہے اب ہندوستان کے پانی پر بیانیے کے غرور اورگھمنڈ کوبھی مل کر خاک میں ملائیں گے۔ معاشی میدان میں وفاق اورصوبوں نے مل کر 24کروڑعوام کیلئے شاندار مستقبل ترتیب دینا ہے۔پاکستان عالمی آبی معاہدوں کے تحت اپنے حقوق کیلئے موثر آواز بلند کرے گا، اور ہمیں خود کو بھارت کا مقابلہ کرنے کیلئے تیار کرنا ہوگا۔

وزیراعظم کا کہنا تھا کہ ہمیں اپنے آبی ذخائر خود بڑھانا ہوں گے کیونکہ اگر آج اقدامات نہ کئے تو آنے والی نسلیں ہمیں معاف نہیں کریں گی۔ان کا کہنا تھا کہ زندہ قومیں مستقبل کیلئے لائحہ عمل تیار کرتی ہیں، شکر ادا کرنے کا واحد طریقہ یہی ہے کہ ہم شبانہ روز محنت کریں۔ معاشی میدان میں کامیابی محض باتوں سے نہیں بلکہ عملی اقدامات سے ممکن ہے، انتھک محنت اورلگن سے ہی معاشی استحکام کا خواب شرمندہ تعبیر ہوگا۔