پاکستان بھارت کے ساتھ تمام مسائل مذاکرات کی میز پر حل کرنے کا خواہاں ہے ، سید یوسف رضا گیلانی

پ*ہمارا پانی روکا گیا تو یہ اعلان جنگ تصور ہو گا ، میڈیا سے گفتگو

جمعہ 6 جون 2025 13:20

ٌملتان(اُردو پوائنٹ اخبارتازہ ترین - آن لائن۔ 06 جون2025ء) چئیر مین سینٹ سید یوسف رضا گیلانی نے کہا ہے کہ پاکستان بھارت کے ساتھ تمام مسائل مذاکرات کی میز پر حل کرنے کا خواہاں ہے ۔ لیکن اگر ہمارا پانی روکا تو یہ اعلان جنگ تصور ہو گا ۔ عالمی برادری بھارتی بیانیہ پہلے ہی مسترد کر چکی ۔ میڈیا سے گفتگو کرتے ہوے انہوں نے کہا پاکستان کے امن پسند ملک ہے ۔

ہم نے دنیا کے سامنے بھی اپنے موقف کو بہتر طریقے سے پیش کیا ہے ۔ ہمارے سفارتی وفود دنیا کے سامنے بھارت کا مکروہ چہرہ بے نقاب کر رہے ہیں ۔ انہوں نے کہا پاکستان ایک ذمہ دار ایٹمی ملک ہے۔ عالمی برادری نے بھارت کا بیانیہ مسترد کر دیا ہے ۔ ہم چاہتے ہیں کہ دو ایٹمی طاقتوں کی آپس میں جنگ نہیں ہونی چاہیے۔ پانی اس وقت سب کی ضرورت ہے ۔

(جاری ہے)

انہوں نے کہا بھارت نے پاکستان پر حملہ کیا تو ہمارے پاس بھی کوئی آپشن نہیں تھا۔

ہم نے بھارت کو پہلگام حملے کی تحقیقات کی پیشکش کی تھی ۔ تاہم بھارت نے ہماری امن کی خواہش کو کمزوری سمجھا ۔ اور حملہ آور ہو گیا ۔ پاک فوج نے بھارتی جارحیت کا منہ تو ڑ جواب دیا ۔ انہوں نے کہا کہ ہماری کوشش ہے کہ تمام مسائل پر بھارت سے مذاکرات کریں ۔ لیکن اگر بھارت نے پانی روکا تو یہ اعلان جنگ تصور ہو گا۔ ہم بھارت کی آبی جارحیت کا ہر محاذ پر ڈٹ کر مقابلہ کر رہے ہیں ۔ انہوں نے کہا پاکستان کی معیشت اس وقت ترقی کی جانب گامزن ہے ۔ ملک میں مہنگائی میں کمی آئی ہے ، ترسیلات زر میں اضافہ ہوا ہے ۔ پالیسی ریٹ میں کمی آئی ہے۔ حکومت کی تمام تر توجہ معیشت کی بہتری کے اس سفر کو جاری رکھنے پر مرکوز ہے ۔