Live Updates

کسان اتحاد نے جعلی وفاقی حکومت، بالخصوص پنجاب میں ترقی کے جھوٹے دعوؤں کو بے نقاب کر دیا ہے، بیرسٹر سیف

گزشتہ ایک سال کے دوران صرف گندم کے کاشتکاروں کو 2200 ارب روپے کا نقصان برداشت کرنا پڑا،مشیر اطلاعات خیبرپختونخوا

منگل 10 جون 2025 20:48

کسان اتحاد نے جعلی وفاقی حکومت، بالخصوص پنجاب میں ترقی کے جھوٹے دعوؤں ..

پشاور(اُردو پوائنٹ اخبارتازہ ترین - این این آئی۔ 10 جون2025ء)وزیر اعلیٰ خیبر پختونخوا کے مشیر برائے اطلاعات و تعلقات عامہ، بیرسٹر ڈاکٹر سیف نے کہا ہے کہ کسان اتحاد نے جعلی وفاقی حکومت، بالخصوص پنجاب میں ترقی کے جھوٹے دعوؤں کا پول کھول دیا ہے۔ گزشتہ ایک سال کے دوران صرف گندم کے کاشتکاروں کو 2200 ارب روپے کا نقصان برداشت کرنا پڑا۔انہوں نے کہا کہ جعلی حکومت کی کسان دشمن پالیسیوں کے باعث زرعی پیداوار میں گزشتہ سال کی نسبت نمایاں کمی واقع ہوئی ہے۔

گندم کی پیداوار میں 8.91 فیصد، کپاس میں 34 فیصد، جبکہ مکئی کی پیداوار میں 15.4 فیصد کمی ریکارڈ کی گئی ہے۔ بیرسٹر ڈاکٹر سیف نے کہا کہ رواں مالی سال کے پہلے دس ماہ میں فوڈ امپورٹ بل 7 ارب ڈالر تک پہنچ چکا ہے، جو ملکی معیشت کے لیے انتہائی تشویشناک ہے۔

(جاری ہے)

ان کا کہنا تھا کہ زراعت ملکی معیشت میں ریڑھ کی ہڈی کی حیثیت رکھتی ہے، مگر جعلی حکومت اس ریڑھ کی ہڈی کو دباکر ترقی کے جھوٹے دعوے کر رہی ہے۔

انہوں نے کہا کہ کسان دشمن عناصر آج بھی وفاق اور پنجاب کے اہم عہدوں پر قابض ہیں۔ پنجاب کا کسان بدحال ہے لیکن مریم نواز کے کان پر جوں تک نہیں رینگتی۔ مشیر اطلاعات نے کہا کہ وزیر اعلیٰ خیبر پختونخوا علی امین خان گنڈاپور نے گزشتہ سال پنجاب کے کسانوں کے زخموں پر مرہم رکھا تھا۔ اگر انہوں نے پنجاب کے کسانوں سے گندم نہ خریدی ہوتی، تو ممکن ہے کہ آج پیداوار اس سے بھی کم ہوتی۔

بیرسٹر ڈاکٹر سیف نے کہا کہ ٹک ٹاکر وزیراعلیٰ مریم نواز کسان دشمن پالیسیوں پر عمل پیرا ہیں، اور ان کا یہ رویہ پورے پاکستان کو بھگتنا پڑے گا۔ کسانوں کو کمزور کرنا، ملک کو کمزور کرنے کے مترادف ہے۔انہوں نے مزید کہا کہ مافیا نے کمیشن کی لالچ میں اپنے مقامی کسانوں کی گندم چھوڑ کر یوکرین سے ناقص گندم درآمد کی، جس سے مقامی کاشتکاروں کو اربوں روپے کا نقصان اٹھانا پڑا۔ اس مافیا کے کئی اہم کردار آج بھی جعلی حکومت میں کلیدی عہدوں پر فائز ہیں۔بیرسٹر ڈاکٹر سیف نے کہا کہ ٹک ٹاکر وزیراعلیٰ جھوٹے دعوؤں سے گریز کریں اور کسانوں کو حقیقی ریلیف فراہم کریں۔