موجودہ بجٹ عوام دوست ثابت ہو گا،ایوان تجارت و صنعت ملتان کی تجاویز کا بجٹ میں شامل ہونا خوش آئند ہے، میاں بختاور تنویر

ملتان (اُردو پوائنٹ اخبارتازہ ترین - اے پی پی۔ 10 جون2025ء) ایوان تجارت و صنعت ملتان کے صدر میاں بختاور تنویر نے وفاقی بجٹ پر ردعمل دیتے ہوئے کہا ہے کہ حکومت کی جانب سے ملتان چیمبر کی ارسال کردہ بیشتر تجاویز کو بجٹ میں شامل کرنا ایک مثبت اور خوش آئند قدم ہے۔ انہوں نے امید ظاہر کی کہ موجودہ مالی سال کا بجٹ عوام دوست ثابت ہوگا ۔انہوں نے کہا کہ اگر حکومت ریونیو ٹارگٹ پورا کر لے تو مہنگائی کی شرح میں کمی ہو گی ۔

بجلی کے نرخوں میں بتدریج کمی کو بھی انہوں نے سراہا۔ میاں بختاور تنویر نے کہا کہ پی آئی اے سمیت دیگر خسارے میں جانے والے سرکاری ادارے قومی خزانے پر بوجھ بن چکے ہیں اور ان کی نجکاری نہ ہونا تشویش ناک ہے۔ انہوں نے حکومت سے مطالبہ کیا کہ نجکاری کے حوالے سے سنجیدہ اقدامات کیے جائیں۔

(جاری ہے)

انہوں نے کہا کہ ماحولیاتی تبدیلی نہ صرف معیشت بلکہ عوام کے لیے بھی ایک سنگین چیلنج بن چکی ہے، اور بجٹ میں اس سے نمٹنے کے لیے اٹھائے گئے اقدامات خوش آئند ہیں۔

انہوں نے خوشی کا اظہار کیا کہ حکومت نے آئی ٹی انڈسٹری کے لیے آئندہ پانچ سال برامدی ہدف 3 ارب ڈالر سے بڑھا کر 25 ارب ڈالر کر دیا ہے۔ انہوں نے حکومت کو تجویز دی کہ حکومت کو سالانہ 10 ارب ڈالر کی منصوبہ بندی کرنی چاہیے تاکہ اس شعبے کو فروغ ملے۔انہوں نے کہا کہ ملک کی درآمدات و برآمدات میں واضح فرق ہے، جو بیرون ملک مقیم پاکستانیوں کی ترسیلات سے پورا کیا جا رہا ہے۔

حکومت کو اوورسیز پاکستانیوں کی حوصلہ افزائی کرنی چاہیے تاکہ وہ وطن واپس آ کر سرمایہ کاری کریں۔انہوں نے کہا کہ زراعت کے شعبے، خصوصاً کپاس کی پیداوار پر توجہ دی جائے۔ انہوں نے کہا کہ ملک میں کاٹن کی پیداوار ڈیڑھ کروڑ گانٹھ سے کم ہو کر 60 سے 70 لاکھ گانٹھ رہ گئی ہے، جس پر فوری اقدامات ضروری ہیں۔انہوں نے اسپیشل انویسٹمنٹ فسیلیٹیشن کونسل (SIFC) کے تحت غیر ملکی سرمایہ کاری کو خوش آئند قرار دیا اور کہا کہ اس سے ملکی معیشت میں بہتری آئے گی۔

اسی طرح بجٹ میں رکھے گئے 1186 ارب روپے کی سبسڈی بجلی کے لیے ایکسپورٹ کرنے والی انڈسٹری کو دی جائے تاکہ برآمدات میں اضافہ ہو۔میاں بختاور نے کہا کہ بھارت پانی کو بطور ہتھیار استعمال کر رہا ہے، جس پر بجٹ میں طویل المدتی پالیسیوں کی ضرورت ہے تاکہ زراعت اور عوام کو اس کے منفی اثرات سے بچایا جا سکے۔ انہوں نے ہائیڈرو الیکٹرک ڈیمز کی تعمیر پر زور دیا تاکہ پانی محفوظ کیا جا سکے اور سستی بجلی فراہم کی جا سکے۔

ایگرو انڈسٹری میں جدید ٹیکنالوجی لانے اور فرسودہ زرعی طریقے ختم کرنے کی ضرورت پر زور دیا۔ چھوٹے کسانوں کو ریلیف دیا جانا بھی انتہائی ضروری ہے۔انہوں نے کہا کہ انکم ٹیکس میں تنخواہ دار طبقے کو دیے گئے ریلیف سے کم آمدنی والے افراد کو سہولت ملی ہے۔ کارپوریٹ سیکٹر پر لگائے گئے ایک فیصد سپر ٹیکس کو کم کر کے 0.5 فیصد کرنا بھی خوش آئند ہے۔

رئیل اسٹیٹ سیکٹر میں حکومتی اقدامات سے مثبت نتائج سامنے آئیں گے۔میاں بختاور نے کہا کہ نان فائلرز کے خلاف اقدامات سے زیادہ لوگ فائلر بنیں گے، لیکن ان تاجروں کو ہراساں نہ کیا جائے جو پہلے سے ٹیکس ادا کر رہے ہیں۔ انہیں ریلیف دیا جائے تاکہ ٹیکس کلچر کو فروغ ملے۔انہوں نے کہا کہ کھاد اور پیسٹی سائیڈ پر ٹیکس نہ لگانا خوش آئند ہے۔ اس سے ایگری ٹیکس کی بہتر وصولی کو یقینی بنایا جائے۔