Live Updates

امریکہ کو چاہیےکہ بھارت کو کان سے پکڑ کر مذاکرات کی میز پر لائے، یہی عالمی مفاد میں ہے

بھارت یکطرفہ طور پر سندھ طاس معاہدے کو معطل یا منسوخ نہیں کرسکتا، جنگ کے بعد بھی بھارت جھوٹ پھیلانے کی کوشش کر رہا ہے، پاکستان میڈیا درست معلومات جبکہ بھارتی گودی میڈیا جھوٹ پھیلا رہا ہے، بلاول بھٹو زرداری

ثنااللہ ناگرہ بدھ 11 جون 2025 21:43

امریکہ کو چاہیےکہ بھارت کو کان سے پکڑ کر مذاکرات کی میز پر لائے، یہی ..

لندن (اردوپوائنٹ اخبار تازہ ترین۔ 11جون 2025) پاکستانی سفارتی مشن وفد کے سربراہ بلاول بھٹو زرداری نے کہا ہے کہ امریکہ کو چاہیےکہ بھارت کو کان سے پکڑ کر مذاکرات کی میز پر لائے، یہی عالمی مفاد میں ہے، جنگ کسی مسئلے کا حل نہیں،مسائل کا حل مذاکرات سے ہی نکالا جاسکتا ہے، بھارت یکطرفہ طور پر سندھ طاس معاہدے کو معطل یا منسوخ نہیں کرسکتا، جنگ کے بعد بھی بھارت جھوٹ پھیلانے کی کوشش کر رہا ہے، پاکستان میڈیا درست معلومات جبکہ بھارتی گودی میڈیا جھوٹ پھیلا رہا ہے۔

انہوں نے برسلز میں یورپی یونین کے رہنماوں سے ملاقات کیلئے روانگی سے قبل لندن میں میڈیا سے گفتگو کرتے ہوئے کہا کہ مسئلہ کشمیر، پانی سمیت تمام مسائل بات چیت کے ذریعے حل کئے جاسکتے ہیں۔ بھارت سے مطالبہ کرتے ہیںوہ اپنی خارجہ پالیسی سے دہشتگردی کو بطور ہتھیار استعمال کرنے کی پالیسی ختم کرے۔

(جاری ہے)

بھارتی جارحیت کے جواب میں پاکستان نے بھرپور اور موثر جواب دیا، اور اس حوالے سے آرمی چیف جنرل عاصم منیر کی عسکری حکمت عملی کو سراہتے ہوئے انہیں فیلڈ مارشل کا اعزازی عہدہ دیا گیا جو ان کی شاندار خدمات کا اعتراف ہے۔

انہوں نے کہا کہ پاک بھارت جنگ کے بعد پاکستان نے آج تک سیز فائر کی پاسداری کی ہے۔ حملے کے جواز کیلئے بھارت کا پورا بیانیہ جھوت پر مبنی تھا۔ جنگ کے بعد بھی بھارت جھوٹ پھیلانے کی کوشش کر رہا ہے۔بلاول بھٹو نے بھارتی میڈیا پر تنقید کرتے ہوئے کہا کہ گودی میڈیا نے جھوٹ کو ہوا دی جبکہ پاکستان کا میڈیا ذمے داری کا مظاہرہ کرتے ہوئے درست معلومات عوام تک پہنچا رہا ہے جس پر وہ میڈیا کو خراج تحسین پیش کرتے ہیں۔

سندھ طاس معاہدے کے مطابق بھارت یکطرفہ طور پر اس معاہدے کو معطل یا منسوخ نہیں کرسکتا۔ عالمی سطح کے معاہدے کی شرائط سے کوئی بھی ملک روگردانی نہیں کرسکتا۔ ہم سمجھتے ہیں کہ سندھ طاس معاہدہ فعال ہے اور اسے کسی طور پر معطل کرنے کا اختیار بھارت کو حاصل نہیں۔ مزید برآں پریس کانفرنس سے خطاب کرتے ہوئے بلاول بھٹو زرداری کا مزید کہنا تھا کہ بھارت کی کوشش ہے کہ ایسے معاہدوں کو پامال کرکے آبی دہشتگردی کا راستہ اختیار کرے، تاہم پاکستان اس معاہدے کو فعال تصور کرتا ہے اور اس پر مکمل عملدرآمد کا خواہاں ہے۔