Live Updates

صوبوں میں سڑکوں کی تعمیر کا معاملہ، خیبرپختونخوا میں وفاقی حکومت نے صرف 19 کروڑ روپے خرچ کیے

رواں مالی سال کے دوران وفاقی حکومت کی جانب سے پنجاب، سندھ اور بلوچستان میں سڑکوں کی تعمیر پر 14 ارب روپے سے زائد خرچ کیے گئے

محمد علی بدھ 11 جون 2025 23:47

لاہور (اُردو پوائنٹ اخبارتازہ ترین۔ 11 جون2025ء) صوبوں میں سڑکوں کی تعمیر کا معاملہ، خیبرپختونخوا میں وفاقی حکومت نے صرف 19 کروڑ روپے خرچ کیے، رواں مالی سال کے دوران وفاقی حکومت کی جانب سے پنجاب، سندھ اور بلوچستان میں سڑکوں کی تعمیر پر 14 ارب روپے سے زائد خرچ کیے گئے۔ تفصیلات کے مطابق رواں مالی سال کے دوران وفاق کی جانب سے صوبوں میں سڑکوں کی تعمیر کیلئے خرچ کیے گئے فنڈز کی تفصیلات سامن آ گئیں۔

رواں مالی سال کے دوران چاروں صوبوں اور آزاد کشمیر میں وفاقی حکومت کے مکمل یا کوفنڈڈ صوبائی روڈ انفراسٹرکچر کے 55 منصوبوں کیلئے مختص 53 ارب 86 کروڑ 35 لاکھ روپے کے بجٹ میں سے اب تک 14 ارب 94 کروڑ 73 لاکھ روپے استعمال کئے گئے ہیں۔ سالانہ ترقیاتی پروگرام 2025-26ء میں دیئے گئے اعداد و شمار کے مطابق پنجاب میں 16 منصوبوں کیلئے 7 ارب 5 کروڑ روپے مختص کئے گئے تھے جن میں سے 2 ارب 51 کروڑ 96 لاکھ روپے استعمال کئے گئے۔

(جاری ہے)

سندھ میں 7 منصوبوں کیلئے 24 ارب 23 کروڑ روپے مختص کئے گئے جن میں سے 3 ارب 15 کروڑ روپے، بلوچستان میں 22 منصوبوں کیلئے 18 ارب 97 کروڑ 58 لاکھ روپے مختص کئے گئے جن میں سے 8 ارب 46 کروڑ 26 لاکھ روپے استعمال ہوئے۔ خیبرپختونخوا میں تین منصوبوں کیلئے مختص 65 کروڑ 76 لاکھ میں سے 19 کروڑ 51 لاکھ روپے، گلگت بلتستان کے چار منصوبوں کیلئے مختص ایک ارب 80 کروڑ روپے میں سے 20 کروڑ جبکہ آزاد جموں و کشمیر کیلئے تین منصوبوں کیلئے مختص ایک ارب 15 کروڑ روپے میں سے 42 کروڑ روپے صرف کئے گئے۔