Live Updates

ایران پر اسرائیلی حملے کی سہولت کاری میں بھارتی خفیہ ایجنسی را ملوث ہے، حافظ منیر حسین احمد

امریکہ، اسرائیل و بھارت کا شیطانی گٹھ جوڑ، ایران کو بھارت کے ساتھ اپنے تعلقات پر غور کرنا ہوگا

جمعہ 13 جون 2025 21:05

کوئٹہ(اُردو پوائنٹ اخبارتازہ ترین - این این آئی۔ 13 جون2025ء) جمعیت علما اسلام کے رہنما حافظ منیر حسین احمد نے ایران پر اسرائیلی حملے کو امت مسلمہ پر حملہ قرار دیتے ہوئے کہا کہ اسرائیلی جارحیت کا جواب نہیں دیا گیا تو اسرائیل کا اگلہ ہدف پاکستان ہوسکتا ہے، ایران پر اسرائیلی حملے کی سہولت کاری میں بھارتی خفیہ ایجنسی را ملوث ہے۔جمعہ کے روز جامعہ مطلع العلوم میں مختلف وفود سے گفتگو کرتے ہوئے انہوں نے کہا کہ اسرائیل مسلسل فلسطین، یمن، شام اور ایران پر حملہ کررہا ہے لیکن عالمی دنیا خاموش تماشائی بنی ہوئی ہے جبکہ اسلامی ممالک کے حکمرانوں نے بھی چپ کا روزہ رکھا ہوا ہے۔

انہوں نے کہا کہ ایران پر ہونے والے حملے میں امریکی اسلحہ، بھارت کی جاسوسی اور اسرائیل کی فوج شامل ہیں ایران پر حملے میں امریکہ، اسرائیل اور بھارت کا تکون ملوث ہے مسلم ممالک کے حکمرانوں نے اگر اب بھی جواب نہیں دیا تو وہ اپنی باری کا انتظار کریں۔

(جاری ہے)

جے یو آئی رہنما نے کہا کہ ایران کو بھارت کے ساتھ دوستی پر نظرثانی کرنا ہوگی کیوں کہ جب سے ایران اور بھارت کے درمیان نزدیکیاں ہوئی ہیں تب سے ایران پر ٹارگیٹیڈ حملے ہورہے ہیں اور ایران کی اہم شخصیات و تنصیبات کو نشانہ بنایا جارہا ہے لگتا ہے کہ بھارتی خفیہ ایجنسی را اسرائیل کی سہولت کاری کررہی ہے ایران کو اب بھارت کے ساتھ اپنے تعلقات پر غور کرنا ہوگا۔

انہوں نے کہا کہ پاک بھارت جنگ میں اسرائیل نے بھارت کی مکمل حمایت اور مکمل تعاون کرتے ہوئے بھارت کو ڈرون فراہم کئے تھے پاکستان پر بھی اسرائیل بھارت کے ذریعے حملہ کرچکا ہے لیکن پاکستان کی بہادر فوج نے انہیں شکست سے دوچار کیا، انہوں نے کہا کہ پاکستان واحد اسلامی ایٹمی ملک ہے اب وقت آچکا ہے کہ پاکستان مسلم دنیا کی قیادت کے لیے آگے آئے اور خطے میں قیام امن کے لیے اپنا کردار ادا کرتے ہوئے اسرائیل کو منہ توڑ جواب دے کیوں کہ جب تک اسرائیل کاوجود قائم رہے گا دنیا میں امن کا قیام ایک خواب ہی رہے گا۔ انہوں نے مسلم ممالک کے حکمرانوں سے اپیل کی کہ وہ اپنے برادر اسلامی ملک ایران کے ساتھ کھڑے ہوجائیں۔