Live Updates

یورپین یونین ہمارے خطے میں مستقل قیام امن کیلئے کردار ادا کرے، بلاول بھٹو

ہمارے خطے میں جنگ کو آگے بڑھایا جا رہا ہے‘ اس صورتحال کو فوری طور ختم ہونا چاہیے‘میڈیا سے گفتگو

ہفتہ 14 جون 2025 14:08

یورپین یونین ہمارے خطے میں مستقل قیام امن کیلئے کردار ادا کرے، بلاول ..

برسلز(اُردو پوائنٹ اخبارتازہ ترین - این این آئی۔ 14 جون2025ء)پاکستان نے اس امید کا اظہار کیا ہے کہ یورپین یونین ہمارے خطے میں مستقل قیام امن کیلئے اپنا کردار ادا کرے گا۔ یہ بات پاکستان سے آئے ہوئے بین الپارلیمانی وفد کے سربراہ بلاول بھٹو نے یورپین ایکسٹرنل ایکشن سروس میں یورپین حکام کے ساتھ ملاقات کے بعد میڈیا سے گفتگو کرتے ہوئے کہی۔انہوں نے کہاکہ امریکا اور برطانیہ کے بعد ہم یہاں یورپین وزارت خارجہ میں آئے ہیں۔

ہم نے یہاں حکام کو کشمیر میں عوام کی جدوجہد، پاکستان پر انڈیا کی جانب سے مسلط کی گئی جنگی صورتحال اور خطے میں امن کیلئے پاکستان کا موقف پیش کیا ہے۔بلاول بھٹونے امید ظاہر کی کہ صدر ٹرمپ نے جس طرح دوبارہ سے کشمیر پر بات کی ہے اس سے امید ہے کہ ہمارے دائمی مسائل حل ہوں گے۔

(جاری ہے)

اس موقع پر انہوں نے سوال کے جواب میں اسرائیل کی جانب سے ایران پر حملے کی شدید الفاظ میں مذمت کرتے ہوئے کہا کہ ہمارے خطے میں جنگ کو آگے بڑھایا جا رہا ہے۔

اس صورتحال کو فوری طور ختم ہونا چاہیے۔واضح رہے کہ گزشتہ ماہ بھارت کے ساتھ فوجی تنازعے کے بعد انڈین وفود کے جواب میں پاکستان کے وزیر اعظم محمد شہباز شریف نے بھی پاکستان سے ایک اعلیٰ سطح کا وفد امریکا، برطانیہ اور یورپی یونین کیلئے روانہ کیا تھا جو ان دنوں اپنے دورے کے آخری پڑائو میں برسلز میں موجود ہے۔