ایران کیخلاف اسرائیلی جارحیت پر مقبوضہ جموںوکشمیر میں غم وغصے کی لہر

اسرائیل فلسطینیوں کی نسل کشی جاری رکھے ہوئے ہے، اب اس نے مشرق وسطی کے امن کو خطرے سے دوچار کر دیا ہے،میر واعظ

ہفتہ 14 جون 2025 16:31

سری نگر(اُردو پوائنٹ اخبارتازہ ترین - این این آئی۔ 14 جون2025ء)بھارت کے غیر قانونی زیر قبضہ جموں و کشمیر میں سیاسی اور مذہبی رہنماؤں نے ایران کے خلاف اسرائیل کی ننگی جارحیت کی شدیدمذمت کی ہے ۔ انہوںنے اسرائیلی جارحیت کو بلاجواز، اشتعال انگیز اور عالمی امن کے لیے سنگین خطرہ قرار دیا ہے۔کشمیر میڈیا سروس کے مطابق کل جماعتی حریت کانفرنس کے سینئر رہنما میر واعظ عمر فاروق نے اسرائیلی کارروائی کی مذمت کی اور اسے ایک بدمعاش ریاست اور عالمی امن کے لیے بہت بڑا خطرہ قرار دیا۔

انہوں نے حملوں میں خواتین اور بچوں سمیت ایرانی شہریوں کی ہلاکت پر انتہائی رنج وغم کا اظہار کیا۔میر واعظ نے گزشتہ روز سرینگر کی تاریخی جامع مسجد میں نماز جمعہ کے اجتماع سے خطاب کے دوران کہا کہ صہیونی ریاست بیگناہ فلسطینیوں کی نسل کشی جاری رکھے ہوئے ہے اور اب اس نے پورے مشرق وسطی کے امن کو خطرے سے دوچار کر دیا ہے۔

(جاری ہے)

انہوںنے اقوام متحدہ اور عالمی برادری پر زور دیا کہ وہ اسرائیل کو غزہ میں نسل کشی اور دیگر ملکوں کو نشانہ بنانے سے روکے۔

مقبوضہ جموںوکشمیر کے وزیر اعلیٰ عمر عبداللہ نے اسرائیلی حملے کی شدید مذمت کرتے ہوئے اسے مکمل طور پر بلاجواز قرار دیا ۔انہوںنے کہا کہ اس حملے کے سنگین عالمی اثرات ہونگے۔ انہوں نے بھارتی وزارت خارجہ پر زور دیا کہ وہ ایران میں موجود کشمیری طلباء کی حفاظت کو یقینی بنائے ۔نیشنل کانفرنس کے رہنما او بھارتی پارلیمنٹ کے رکن آغا سید روح اللہ مہدی نے ’’ایکس ‘‘ پر لکھا کہ اسرائیل نے فلسطین، یمن، شام، لبنان اور ایران کو بمباری کا نشانہ بنایا ہے، صیہونی حکومت اپنا دفاع نہیں کر رہی بلکہ ایک استعماری ٹھگ کا کردار ادا کر رہی ہے۔

پیپلز ڈیموکریٹک پارٹی (پی ڈی پی) کی صدر محبوبہ مفتی نے کہا کہ اسرائیل نے ایران کو نشانہ بنا کر بے شرمی اور ڈھٹائی کی انتہا کر دی ہے ۔ انہوںنے ایکس پر لکھا کہ اسرائیل بے لگام ہو چکا ہے، اسکی جارحیت پر مغرب کی خاموشی افسوسناک ہے ‘‘ ۔