Live Updates

26 نومبر احتجاج،بشری بی بی کی تمام عبوری ضمانتوں میں توسیع ،مزید سماعت24 جون تک ملتوی

منگل 17 جون 2025 21:37

اسلام آباد(اُردو پوائنٹ اخبارتازہ ترین - آن لائن۔ 17 جون2025ء) پاکستان تحریک انصاف کے مرکزی رہنماؤں کے خلاف 26 نومبر احتجاج کے سلسلے میں درج مختلف مقدمات میں انسداد دہشت گردی عدالت نے بانی پی ٹی آئی کی اہلیہ بشری بی بی سمیت تمام عبوری ضمانتوں میں توسیع کرتے ہوئے آئندہ سماعت 24 جون تک ملتوی کر دی۔بانی پی ٹی آئی چیئرمین عمران خان کی اہلیہ بشریٰ بی بی، سینیئر وکیل سلمان اکرم راجہ، شیر افضل مروت، عمیر نیازی، علی بخاری اور دیگر رہنماؤں کی مختلف تھانوں میں درج مقدمات میں عبوری ضمانتیں زیر سماعت ہیں۔

عدالت نے ہدایت کی کہ آئندہ سماعت پر تمام ملزمان کی جانب سے دلائل دیے جائیں گے اور تمام ضمانتوں پر ایک ساتھ سماعت کی جائے گی۔دوران سماعت شیر افضل مروت، عمیر نیازی اور دیگر ملزمان عدالت میں پیش ہوئے، جبکہ بشریٰ بی بی اور سلمان اکرم راجہ کی جانب سے حاضری سے استثنا کی درخواستیں دائر کی گئیں، جو عدالت نے منظور کر لیں۔

(جاری ہے)

پی ٹی آئی رہنماؤں کے خلاف تھانہ کراچی کمپنی، کوہسار، مارگلہ، آبپارہ، ترنول اور سیکریٹریٹ میں مقدمات درج ہیں۔

بشریٰ بی بی کی تھانہ سیکرٹریٹ کے مقدمے میں ضمانت کی سماعت بھی 24 جون تک ملتوی کر دی گئی ہے۔وکیل صفائی نے عدالت کو بتایا کہ ان ہی مقدمات میں دیگر ملزمان کی ضمانتیں بھی مقرر ہیں، جنہیں ایک ساتھ سنا جانا چاہیے۔ عدالت نے ان دلائل سے اتفاق کرتے ہوئے تمام ضمانتوں پر آئندہ سماعت 24 جون کو مقرر کر دی۔