بی آئی ایس پی کی جانب سے بینظیر ہنرمند پروگرام کا آغاز، صدر مملکت آصف علی زرداری 21 جون کو بینظیر ہنرمند پورٹل کا اجراء کریں گے

اسلام آباد (اُردو پوائنٹ اخبارتازہ ترین - اے پی پی۔ 17 جون2025ء) صدر مملکت آصف علی زرداری 21 جون کو شہید محترمہ بینظیر بھٹو کے یوم پیدائش کے موقع پر بینظیر ہنرمند پورٹل کا اجراء کریں گے۔ بینظیر انکم سپورٹ پروگرام اب نہ صرف مالی معاونت کرے گا بلکہ لوگوں کو اپنے پائوں پر بھی کھڑا کرے گا۔ بی آئی ایس پی ہیڈ کوارٹرز میں ’’فرینڈز آف بی آئی ایس پی‘‘ پلیٹ فارم کے تحت مشاورتی ورکشاپ کا انعقاد کیا گیا جس میں چیمبرز آف کامرس، این جی اوز اور ترقیاتی شراکت داروں نے شرکت کی اور بینظیر ہنرمند پروگرام کے اقدام کو سراہا ۔

بینظیر انکم سپورٹ پروگرام بینظیر ہنر مند پروگرام کے نام سے ایک انقلابی اقدام کا آغاز کررہا ہے۔ اس پروگرام کا مقصد مستحقین کو خود انحصاری اور پائیدار روزگار کے لیے ہنر مندانہ تربیت سے لیس کرنا ہے۔

(جاری ہے)

پاکستان کی تاریخ میں یہ پہلا موقع ہوگا کہ بی آئی ایس پی کے تحت ایک جامع اور منظم سکل ڈویلپمنٹ پروگرام متعارف کروایا جا رہا ہے۔اس تاریخی موقع کو یادگار بنانے کے لیے صدر مملکت آصف علی زرداری 21 جون 2025ء کو شہید محترمہ بینظیر بھٹو کے یوم پیدائش کے موقع پر بینظیر ہنرمند پورٹل کا باقاعدہ اجراء کریں گے۔

محترمہ بینظیر بھٹو ہمیشہ پسماندہ طبقے کی بااختیاری اور وقار کی علمبردار رہیں اور یہ پروگرام ان کے خواب کی تعبیر ہے۔اس حوالے سے چیئرپرسن بی آئی ایس پی سینیٹر روبینہ خالد نے بی آئی ایس پی ہیڈ کوارٹرز میں منعقدہ مشاورتی ورکشاپ کی صدارت کی جس میں مختلف شعبہ جات کے نمائندگان شریک ہوئے جن میں چیمبرز آف کامرس اینڈ انڈسٹری آف پاکستان، ڈبلیو ایف پی، ڈبلیو ایچ او، جی آئی زیڈ اور کئی غیر سرکاری تنظیمیں شامل تھیں۔

سینیٹر روبینہ خالد اور سیکرٹری بی آئی ایس پی عامر علی احمد نے شرکا کو خوش آمدید کہا اور اس قومی مقصد کے لیے تعاون پر زور دیا۔شرکا سے گفتگو کرتے ہوئے سینیٹر روبینہ خالد نے کہا کہ بی آئی ایس پی صرف مالی امداد تک محدود نہیں رہا، اب ہم بینظیر ہنرمند پروگرام کے ذریعے لوگوں کو ہنر دے کر انہیں باوقار طریقے سے غربت سے نکالنے میں مدد دیں گے تاکہ وہ خود کفیل بن سکیں۔

انہوں نے مزید کہا کہ شہید محترمہ بینظیر بھٹو کا قول تھا ’’ہنر آپ کا سرمایہ ہے‘‘۔ بی آئی ایس پی پہلے ہی مالی معاونت سے زندگیوں میں بہتری لا رہا ہے اور اب یہ پروگرام مارکیٹ کی ضروریات کے مطابق مہارتیں سکھا کر بین الاقوامی سرٹیفکیشن کے ساتھ مستحقین کو روزگار کے نئے مواقع فراہم کرے گا۔سیکرٹری بی آئی ایس پی عامر علی احمد نے بھی سیشن سے خطاب کیا اور پروگرام کے لیے مکمل ادارہ جاتی تعاون کی یقین دہانی کرائی، بی آئی ایس پی کے جامع، شواہد پر مبنی اور عوام پر مبنی ترقی کے عزم کا اعادہ کیا۔

سیشن کے اختتام پر سٹیک ہولڈرز نے غربت کے خاتمے کے لیے بی آئی ایس پی کے اختراعی نقطہ نظر کو نہ صرف سراہا بلکہ پروگرام کے نفاذ، صنعت سے منسلک ہونے اور روزگار کی سہولت فراہم کرنے میں تعاون کے لیے بھرپور آمادگی کا اظہار کیا۔