وفاقی وزیر برائے مذہبی امور سردار محمد یوسف حج آپریشن 2025 کی کامیاب تکمیل کے بعد وطن واپس پہنچ گئے

منگل 17 جون 2025 23:10

اسلام آباد (اُردو پوائنٹ اخبارتازہ ترین - اے پی پی۔ 17 جون2025ء) وفاقی وزیر برائے مذہبی امور سردار محمد یوسف حج آپریشن 2025 کی کامیاب تکمیل کے بعد وطن واپس پہنچ گئے، جہاں اسلام آباد انٹرنیشنل ایئرپورٹ پر ان کا فقیدالمثال استقبال کیا گیا۔ اس موقع پر پاکستان سٹیزن فورم کی جانب سے ایک خصوصی استقبالیہ تقریب کا انعقاد کیا گیا، جس میں پنجاب اسمبلی کے پارلیمانی سیکریٹری ملک افتخار، خیبرپختونخوا اسمبلی کے پارلیمانی لیڈر سردار شاہ جہاں یوسف، مرکزی جمعیت اہلحدیث پاکستان کے رہنما، انجمن تاجران کے نمائندگان سمیت مختلف مکاتبِ فکر سے تعلق رکھنے والی اہم شخصیات نے شرکت کی۔

منگل کو اسلام اباد ایئرپورٹ پر میڈیا سے گفتگو کرتے ہوئے سردار محمد یوسف نے کہا کہ حج آپریشن 2025 اللہ تعالیٰ کے فضل و کرم سے انتہائی کامیابی کے ساتھ مکمل ہوا۔

(جاری ہے)

انہوں نے کہا کہ وزیراعظم محمد شہباز شریف، وزیرخارجہ اسحاق ڈار اور کابینہ کے دیگر ارکان کے تعاون سے اس سال حجاج کرام کو مثالی سہولیات فراہم کی گئیں۔وفاقی وزیر نے بتایا کہ اس سال پاکستان سے 1 لاکھ 15 ہزار عازمین نے فریضہ حج ادا کیا، جن میں سے اب تک 23 ہزار افراد وطن واپس پہنچ چکے ہیں۔

انہوں نے کہا کہ پی آئی اے نے تمام پروازیں شیڈول کے مطابق چلائیں جبکہ حج مشن، میڈیکل ٹیم، معاونین حج اور وزارت کے دیگر شعبہ جات نے شب و روز محنت کرکے بہترین خدمات فراہم کیں۔انہوں نے بتایا کہ وزیراعظم شہباز شریف اور قائد نواز شریف کی خصوصی ہدایات پر وہ ذاتی طور پر تین مرتبہ سعودی عرب گئے اور عرفات، مزدلفہ اور دیگر مقامات پر انتظامات کا خود جائزہ لیا۔

’’امسال شکایات نہ ہونے کے برابر تھیں، جو معمولی نوعیت کی تھیں، وہ موقع پر ہی حل کر دی گئیں۔‘‘سردار محمد یوسف نے سعودی فرمانروا شاہ سلمان بن عبدالعزیز اور سعودی وزارتِ حج و اوقاف کو بھی شاندار انتظامات پر خراجِ تحسین پیش کیا۔ انہوں نے کہا کہ مسلم لیگ (ن) کی حکومت نے عوامی خدمت کی روایت برقرار رکھی ہے اور وہ آئندہ بھی اپنی ذمہ داریاں ایمانداری سے ادا کرنے کے لیے پرعزم ہیں۔