حکومت نے بجٹ پر اتحادی جماعتوں کے تحفظات دور کرنے کی یقین دہانی کرادی

یہ وقت باہمی مشاورت، مفاہمت اور قومی یکجہتی سے ملک کو آگے لے جانے کا ہے، تمام مزید مسائل کو بھی بات چیت سے حل کیا جائے گا؛ نائب وزیراعظم اسحاق ڈار کا قومی اسمبلی میں اظہار خیال

ساجد علی بدھ 18 جون 2025 15:21

حکومت نے بجٹ پر اتحادی جماعتوں کے تحفظات دور کرنے کی یقین دہانی کرادی

اسلام آباد ( اُردو پوائنٹ اخبارتازہ ترین۔ 18 جون 2025ء ) وفاقی حکومت کی جانب سے بجٹ پر اتحادی جماعتوں کے تحفظات دور کرنے کی یقین دہانی کرادی گئی۔ تفصیلات کے مطابق قومی اسمبلی اجلاس میں نائب وزیراعظم اور وزیر خارجہ اسحاق ڈار نے بجٹ کے حوالے سے تفصیلی بیان میں اتحادی جماعتوں خاص طور پر پاکستان پیپلز پارٹی کے تحفظات دور کرنے کا اعلان کرتے ہوئے کہا کہ ڈیجیٹل ٹیکس کے معاملے پر تمام فریقین سے بات چیت کے بعد فیصلہ ہوا ہے کہ سروسز پر ٹیکس کا اختیار بدستور صوبوں کے پاس رہے گا، سولر پینلز پر 18 فیصد سیلز ٹیکس عائد کرنے کا ابتدائی فیصلہ عوام پر اضافی بوجھ تھا، افہام و تفہیم سے اب یہ شرح کم کرکے 10 فیصد کر دی گئی ہے، یہ تمام فیصلے اتحادی جماعتوں اور سٹیک ہولڈرز سے مشاورت کے بعد اتفاق رائے سے کیے گئے ہیں۔

(جاری ہے)

انہوں نے کہا کہ تنخواہوں میں 6 فیصد اضافے کی تجویز کو بڑھا کر 10 فیصد تک کر دیا گیا، پی ایس ڈی پی کے حوالے سے سندھ کی جانب سے جو مطالبات سامنے آئے انہیں سنا گیا اور اے پی سی سی میں سندھ کی یونیورسٹیوں کا بجٹ ابتدائی 2.6 ارب روپے سے بڑھا کر دوبارہ 4.7 ارب روپے کر دیا گیا ہے، پی ڈبلیو ڈی کے خاتمے کے بعد اس کے منصوبے صوبوں کو منتقل کیے گئے تاہم سندھ کو اس پر تحفظات تھے جس پر وزیراعظم نے فیصلہ کیا کہ ان منصوبوں کو اب ملک گیر سطح پر پی آئی ڈی سی ایل کے تحت انجام دیا جائے گا۔

نائب وزیراعظم کا کہنا ہے کہ اب پی آئی ڈی سی ایل کو تمام صوبوں میں توسیع دے دی گئی ہے اور یہ ادارہ تمام نئے ترقیاتی منصوبوں کی نگرانی کرے گا، یہ وقت باہمی مشاورت، مفاہمت اور قومی یکجہتی سے ملک کو آگے لے جانے کا ہے اس لیے تمام مزید مسائل کو بھی بات چیت سے حل کیا جائے گا، ہم سب کو مل جل کر پاکستان کے معاشی استحکام کیلئے کام کرنا ہے۔