وفاقی وزیر بحری امور محمد جنید انوار چوہدری سے ازبک سفیر کی ملاقات، مشترکہ ورکنگ گروپ کے قیام پر اتفاق

اسلام آباد (اُردو پوائنٹ اخبارتازہ ترین - اے پی پی۔ 19 جون2025ء) پاکستان اور ازبکستان نے بحری تعاون کو فروغ دینے اور بلیو اکانومی، گرین شپنگ اور وسطی ایشیا کو بحیرہ عرب سے جوڑنے والے تجارتی ڈھانچے کی تشکیل کے لیے ایک مشترکہ ورکنگ گروپ کے قیام پر اتفاق کیا ہے۔یہ پیش رفت وفاقی وزیر بحری امور محمد جنید انوار چوہدری اور پاکستان میں ازبکستان کے سفیر کے درمیان اعلیٰ سطحی ملاقات میں سامنے آئی جس میں دونوں فریقین نے سمندری رابطوں کو مستحکم کر کے مشترکہ اقتصادی ترقی، علاقائی ربط اور سمندر پر مبنی صنعتوں کے ذریعے دیرپا خوشحالی کو فروغ دینے کی ضرورت پر زور دیا۔

وفاقی وزیر جنید انوار چوہدری نے ازبکستان کو گوادر اور کراچی جیسے بندرگاہی شہروں سے عالمی منڈیوں تک کم لاگت، موثر رسائی دینے کی اہمیت پر روشنی ڈالی۔

(جاری ہے)

انہوں نے ازبکستان کو سڑکوں کے نیٹ ورک کو بہتر بنانے اور گوادر پورٹ سے منسلک ہونے کی دعوت دیتے ہوئے کہا کہ یہ تجارتی اعتبار سے موثر اور عالمی پائیداری کے اہداف سے ہم آہنگ ہے۔ملاقات میں بلیو اکانومی کے اہم شعبوں جیسے فشریز، آبی زراعت، سمندری خوراک کی تیاری اور ساحلی سیاحت میں مشترکہ منصوبوں کے امکانات پر بھی غور کیا گیا جن سے خلیج، افریقہ اور جنوب مشرقی ایشیا کی منڈیوں میں بہتر منافع کمایا جا سکتا ہے۔

وفاقی وزیر بحری امور نے تجویز پیش کی کہ ازبکستان اور قازقستان کی خشک بندرگاہوں کو پاکستان کی سمندری بندرگاہوں سے سڑک و ریل نیٹ ورک کے ذریعے جوڑ کر ایک تجارتی راہداری قائم کی جائے۔یہ منصوبہ 20 ارب ڈالر سے زائد کی تجارت کے دروازے کھول سکتا ہے اور وسطی ایشیائی ممالک کو بحری معیشت میں موثر شرکت کا موقع فراہم کرے گا۔ملاقات میں مربوط لاجسٹک حل، بانڈڈ ویئر ہائوسز، ملٹی موڈل ٹرانسپورٹ سسٹم اور سمارٹ پورٹ انفراسٹرکچر جیسے موضوعات پر بھی تبادلہ خیال ہوا۔

جنید انوار چوہدری نے ازبکستان کو پاکستان کی بندرگاہی صنعت، جہاز سازی اور قابل تجدید سمندری توانائی منصوبوں میں سرمایہ کاری کی دعوت دی۔ انہوں نے اس ملاقات کو دونوں ممالک کے درمیان بلیو اکانومی، اختراع اور علاقائی انضمام پر مبنی طویل المدتی بحری شراکت داری کی بنیاد قرار دیا۔وفاقی وزیر کی تجویز پر دونوں فریقین نے تکنیکی ماہرین پر مشتمل مشاورتی ملاقاتوں کے فوری انعقاد پر بھی اتفاق کیا تاکہ ازبکستان کی بحری ضروریات اور پاکستان کی ممکنہ معاونت کی تفصیلات کو حتمی شکل دی جا سکے۔

وفاقی وزیر نے ازبکستان، قازقستان اور پاکستان کے درمیان سہ فریقی تعاون کی تجویز بھی پیش کی جس کے ذریعے گوادر پورٹ تک زمینی رسائی کو بہتر بنایا جا سکے اور وسطی ایشیائی ریاستوں کے لیے گوادر کو ایک تجارتی دروازہ بنایا جا سکے۔ازبک سفیر نے خصوصی طور پر فشریز اور سمندری خوراک کے شعبے میں مشترکہ منصوبوں میں دلچسپی کا اظہار کیا۔ انہوں نے ازبک تجارت کے لیے پاکستان میں آف ڈاک ٹرمینل مختص کرنے کی تجویز بھی پیش کی۔سفیر نے وزیر کو آگاہ کیا کہ ازبک تاجر برادری کا ایک اعلیٰ سطحی وفد جلد کراچی کا دورہ کرے گا، جہاں وہ بندرگاہی انفراسٹرکچر اور بالخصوص میرین فشریز ڈیپارٹمنٹ کی سرگرمیوں کا جائزہ لے گا تاکہ دو طرفہ تجارتی تعاون کو مزید وسعت دی جا سکے۔