Live Updates

سینئر صحافی رانا عمران لطیف پر حملہ، صحافتی تنظیموں اور پی ایف یو جے کا فوری کارروائی کا مطالبہ

جمعہ 20 جون 2025 02:10

اسلام آباد (اُردو پوائنٹ اخبارتازہ ترین - اے پی پی۔ 20 جون2025ء) پاکستان فیڈرل یونین آف جرنلسٹس ( پی ایف یوجے )، دیگر صحافتی تنظیموں اور انسانی حقوق کے گروپوں نے ملک بھر سے سینئر صحافی اور اینکرپرسن رانا عمران لطیف پر ہونے والے حملے کی شدید مذمت کی ہے، جنہیں اسلام آباد کے ریڈ زون میں واقع ایف-7 مرکز میں نشانہ بنا یا گیا ہے ۔پاکستان فیڈرل یونین آف جرنلسٹس ( پی ایف یو جے )، لاہور پریس کلب اور دیگر صحافتی اداروں نے جمعرات کو ایک مشترکہ بیان جاری کرتے ہوئے اس واقعے کو صحافتی آزادی اور صحافیوں کی سلامتی کے لیے ایک سنگین خطرہ قرار دیا۔

پی ایف یو جے کے صدر افضل بٹ اور لاہور پریس کلب کے صدر ارشد انصاری نے حکومت سے مطالبہ کیا کہ وہ اس واقعے کی شفاف اور غیرجانبدارانہ تحقیقات شروع کرے اور ذمہ دار افراد کو قانون کے کٹہرے میں لایا جائے۔

(جاری ہے)

مشترکہ بیان میں کہا گیا کہ یہ حملہ صرف ایک فرد پر نہیں بلکہ پورے صحافتی برادری کی سلامتی اور عوامی مسائل پر رپورٹنگ کی آزادی پر سوالیہ نشان ہے۔

تنظیموں نے ریاستی اداروں سے مطالبہ کیا کہ وہ اس بات کی بھی تحقیقات کریں کہ ایک انتہائی سکیورٹی والے علاقے میں ایسا واقعہ کیسے پیش آیا، اور رانا عمران لطیف سمیت دیگر میڈیا کارکنوں کو فوری تحفظ فراہم کیا جائے۔رانا عمران لطیف طویل عرصے سے انسانی حقوق اور سماجی مسائل پر رپورٹنگ کر رہے ہیں۔ وہ غیر قانونی شیشہ کیفوں کے خلاف مسلسل آواز بلند کر رہے تھے اور متعدد بین الاقوامی اداروں کے ساتھ بھی کام کر چکے ہیں۔