عمانی بائیکرز کا دورہ پاکستان دونوں برادر ممالک کے عوامی رابطوں کے استحکام اور ثقافتی تبادلوں کے فروغ میں اہم کردار ادا کرے گا،حکومت بائیکرز کے دورہ کو محفوظ، آرام دہ اور یادگار بنانے کے لیے پرعزم ہے، رانا ثناء اللہ

اسلام آباد (اُردو پوائنٹ اخبارتازہ ترین - اے پی پی۔ 20 جون2025ء) وزیراعظم کے مشیر برائے سیاسی و عوامی امور رانا ثناء اللہ نےکہا ہے کہ عمانی بائیکرز کا دورہ پاکستان دونوں برادر ممالک کے عوامی رابطوں کے استحکام اور ثقافتی تبادلوں کے فروغ میں اہم کردار ادا کرے گا،حکومت بائیکرز کے دورہ کو محفوظ، آرام دہ اور یادگار بنانے کے لیے پرعزم ہے، بائیکرز پاکستان کے خوبصورت شمالی علاقہ جات کے سحر انگیز حسن کا نظارہ کریں گے ۔

ان خیالات کا اظہاروزیراعظم کے مشیر برائے سیاسی و عوامی امور رانا ثناء اللہ نے پاکستان کا دورہ کرنے والے عمان کے بوشر بائیکرز کلب کے ارکان کا پرتپاک خیرمقدم کرتے ہوئے کیا۔ انہوں نے دونوں ممالک کے درمیان سیاحتی اور ثقافتی روابط کے فروغ کی اہمیت کوبھی اجاگرکیا ۔

(جاری ہے)

وزارت بین الصوبائی رابطہ (آئی پی سی) کی جانب سے جمعہ کو یہاں گنز اینڈ کنٹری کلب میں عمانی بائیکرز کے اعزاز میں ظہرانے کی تقریب کے موقع پر رانا ثناء اللہ نے دورہ کی سہولت فراہم کرنے پر عمان میں پاکستانی سفارت خانے اور وزارت خارجہ سے اظہار تشکر کرتے ہوئے کہا کہ عمانی بائیکرز کی یہاں موجودگی پاکستان اور عمان کے درمیان سیاحت اور ثقافتی تعلقات کے فروغ میں ایک اہم قدم کی عکاسی کرتی ہے۔

راناثناء اللہ نے بائیکرز کو یقین دلایا کہ حکومت ان کے دورہ کو محفوظ، آرام دہ اور یادگار بنانے کے لیے پرعزم ہے، بائیکرز پاکستان کے خوبصورت شمالی علاقہ جات کے سحر انگیز حسن کا نظارہ کریں گے ۔ انہوں نے کہا کہ تمام انتظامات بشمول سیکورٹی اور مہمان نوازی کو احتیاط کے ساتھ مربوط کیا گیا ہے۔انہوں نے کہا کہ یہ دورہ پاکستان اور عمان کے عوام کے عوام سے تعلقات کو مستحکم کرنے اور ثقافتی تبادلوں کو فروغ دینے میں اہم کردار ادا کرے گا۔

تقریب سے خطاب کرتے ہوئے وفاقی سیکرٹری آئی پی سی محی الدین احمد وانی نے بھی بائیکرز کومبارکباد پیش کرتے ہوئے ان سے اظہار تشکر بھی کیا۔انہوں نے کہا کہ ہم شکر گزار ہیں کہ آپ شمالی علاقوں کی خوبصورتی کو دیکھنے کے لیے پاکستان آئے ہیں۔ انہوں نے مزید کہا کہ اس دورے سے دونوں ممالک کے درمیان کھیلوں اور ثقافتی سیاحت کو فروغ ملے گا۔بوشر بائیکرز کلب کے رکن محمد النبھانی نے دورے کے حوالے سے اپنے جوش و خروش کا اظہار کرتے ہوئے کہاکہ ہم پاکستان کی خوبصورتی کے نظارے اور پاکستانی عوام سے ملنے کے منتظر ہیں۔

دریں اثناء ظہرانے سے قبل بوشر بائیکرز کلب کے ممبران نے اسلام آباد کی فیصل مسجد میں نماز جمعہ بھی ادا کی۔بوشر بائیکرز کلب کے ممبران کے وفد میں عیسیٰ الحسنی، محمد النبھانی، کامل اے آئی وہبی، ماجد الرواحی، محمد منینی، ماجد الوہابی اور محمد الرواحی شامل ہیں۔واضح رہے کہ عمان میں پاکستانی سفارتخانے کے زیراہتمام پاکستان اور عمان کے درمیان دوطرفہ تعلقات کے فروغ کے لیے خیر سگالی کے سفر کی منصوبہ بندی کی گئی ، عمان کا پاکستان میں خیر سگالی کا سفر عمان میں مقیم پاکستانی شہری عاطف علی کی قیادت میں ایک وژنری اقدام ہے۔

اس پروجیکٹ کا مقصد عمانی موٹر سائیکل سواروں کے پاکستان میں سفر کا اہتمام دونوں برادر ممالک کے درمیان سفارتی اور ثقافتی تعلقات کو بڑھانے میں اپنا حصہ ڈالنا ہے،یہ سفر جدید اور بامعنی انداز میں اتحاد، دوستی اور علاقائی تعاون کے پیغام کو تقویت دینے کی ایک کوشش بھی ہے۔ \395\932