Live Updates

ہٹ دھرمی برقرار، بھارت کا سندھ طاس معاہدہ بحال نہ کرنے کا اعلان

وہ پانی جو پاکستان جا رہا تھا ہم اسے ایک نہر بنا کر راجستھان کی طرف لے جائیں گے، پاکستان کو وہ پانی نہیں ملے گا جس کا وہ ناحق فائدہ اٹھا رہا تھا؛ بھارتی وزیر داخلہ امت شاہ کا انٹرویو

ساجد علی ہفتہ 21 جون 2025 14:24

ہٹ دھرمی برقرار، بھارت کا سندھ طاس معاہدہ بحال نہ کرنے کا اعلان

نئی دہلی ( اُردو پوائنٹ اخبارتازہ ترین۔ 21 جون 2025ء ) بھارت نے ہٹ دھرمی کا مظاہرہ کرتے ہوئے ایک بار پھر سندھ طاس معاہدہ بحال نہ کرنے کا اعلان کردیا۔ بھارتی وزیر داخلہ امیت شاہ نے ٹائمز آف انڈیا کو انٹرویو دیتے ہوئے کہا کہ سندھ طاس معاہدے کے تحت پاکستان جانے والا پانی بحال نہیں کیا جائے گا، اس معاہدے کی بحالی کبھی بھی ممکن نہیں ہوگی، یہ معاہدہ کبھی بحال نہیں ہوگا، اس کے تحت وہ پانی جو پاکستان جا رہا تھا ہم اسے ایک نہر بنا کر راجستھان کی طرف لے جائیں گے، پاکستان کو وہ پانی نہیں ملے گا جس کا وہ ناحق فائدہ اٹھا رہا تھا۔

بتایا گیا ہے کہ بھارت نے 1960ء میں طے پانے والے اس معاہدے کو اس وقت معطل کر دیا تھا جب بھارتی زیر انتظام کشمیر کے علاقے پہلگام میں ہونے والے ایک حملے میں اس کے 26 شہری مارے گئے تھے بھارتی حکومت نے اس کارروائی کو دہشت گردی قرار دیا تھا، نئی دہلی نے اس حملے کی ذمہ داری پاکستان پر عائد کی تاہم اسلام آباد حکومت ان الزامات کو مسترد کرتی ہے، اگرچہ پاکستان نے اس حملے میں ملوث ہونے کی تردید کی لیکن دونوں ایٹمی ہمسایہ ممالک کے درمیان گزشتہ ماہ دہائیوں کے بدترین تصادم کے بعد جنگ بندی کے باوجود یہ معاہدہ اب بھی معطل ہے۔

(جاری ہے)

ادھر عالمی نیوز ایجنسی رائٹرز کا کہنا ہے کہ بھارت ایک اُس بڑے دریا سے اندرون ملک پانی کی مقدار میں زبردست اضافہ کرنے کا منصوبہ بنا رہا ہے جو پاکستان کے کھیتوں کو سیراب کرتا ہے جب کہ پاکستان کا یہ مؤقف رہا ہے کہ سندھ طاس معاہدے میں یکطرفہ طور پر دستبردار ہونے کی کوئی گنجائش نہیں اور اگر پاکستان جانے والے دریائی پانی کو روکا گیا تو اسے جنگی اقدام تصور کیا جائے گا اور اگر بھارت اس پانی کو روکتا ہے تو اس کے نتیجے میں جوہری جنگ بھی ہو سکتی ہے۔