گورنر ہاؤس پشاور میں معرکہ حق میں فتح کے جشن کی تقریب کا انعقاد، افواجِ پاکستان کو زبردست الفاظ میں خراج تحسین پیش

اتوار 22 جون 2025 00:30

پشاور (اُردو پوائنٹ اخبارتازہ ترین - اے پی پی۔ 22 جون2025ء) گورنر خیبرپختونخوا فیصل کریم کنڈی کی جانب سے گورنر ہاؤس پشاور میں معرکہ حق میں فتح کے جشن کی ایک پروقار تقریب کا انعقاد ہوا جس میں افواجِ پاکستان کو زبردست الفاظ میں خراج تحسین پیش کیا گیا جبکہ آپریشن بنیان المرصوص معرکہ حق کے دوران بہترین کارکردگی کا مظاہرہ کرنے پر میڈیا پرسنز کو ایوارڈز سے نوازا گیا۔

تقریب میں میڈیا پرسنز کے علاوہ صوبائی صدر اے این پی میاں افتخار حسین ، صوبائی چیئرمین قومی وطن پارٹی سکندر شیرپاؤ ، سابق گورنر خیبرپختونخوا اقبال ظفر جھگڑا، سابق گورنر خیبرپختونخوا انجینئر شوکت اللہ، خیبرپختونخوا اسمبلی کے اپوزیشن لیڈر ڈاکٹر عباداللّٰہ خان ، پارلیمنٹرینز اور دیگر نے کثیر تعداد میں شرکت کی۔

(جاری ہے)

تقریب میں ایرانی قونصل جنرل بھی شریک ہوئے۔

تقریب کا آغاز تلاوت کلام پاک اور نعت رسول مقبول سے ہوا۔ تقریب میں شہداء کے حوالے سے ایک ڈاکومنٹری بھی دکھائی گئی۔تقریب میں گورنر خیبر پختونخوا فیصل کریم کنڈی نے شرکت کرنے پر مہمانوں کا شکریہ ادا کیا اور اپنے خطاب میں کہا کہ معرکہ حق میں افواج پاکستان نے پاکستان کو عظیم فتح سے ہمکنار کیا۔ انہوں نے کہا کہ افواجِ پاکستان نے قوم کا سر فخر سے بلند کیا۔

آج پوری دنیا میں پاکستانی فخر محسوس کرتے ہیں۔ انہوں نے کہا کہ پوری امت مسلمہ کو افواجِ پاکستان پر فخر ہے۔ انہوں نے کہا کہ معرکہ حق میں فتح کے بعد چئیرمین پاکستان پیپلز پارٹی بلاول بھٹو کی قیادت میں پاکستانی وفد نے پاکستان کا موقف بہترین طریقے سے دنیا کے سامنے پیش کیا ہے اور بڑی سفارتی کامیابی حاصل کی ہے۔ انہوں نے کہا کہ ان سارے حالات میں پاکستانی میڈیا نے بہترین کردار ادا کیا اور دنیا کو سچ دکھایا۔بعد ازاں گورنر خیبر پختونخوا فیصل کریم کنڈی نے میڈیا پرسنز کو ایوارڈز سے بھی نوازا۔