حکومت کی پالیسیاں مکمل طور پر کسان دشمن ہیں‘ رشید منہالہ

نالائق وزرا ء ،مشیران زراعت اور دیہی معیشت کو تباہ کرنے پر تلے ہوئے ہیں‘ صدر کسان بورڈ وسطی پنجاب

پیر 23 جون 2025 18:12

لاہور(اُردو پوائنٹ اخبارتازہ ترین - این این آئی۔ 23 جون2025ء)کسان بورڈ پاکستان وسطی پنجاب کے صدر میاں رشید منہالہ نے کہا ہے کہ حکومت کی پالیسیاں مکمل طور پر کسان دشمن ہیں، نالائق وزرا ء اور مشیران زراعت اور دیہی معیشت کو تباہ کرنے پر تلے ہوئے ہیں،نئے مالی سال کے بجٹ میں زرعی آمدن پر ساڑھے 10 ارب روپے کا ٹیکس ہدف مقرر کرکیا گیا ہے جو رواں مالی سال کی نسبت 200 فیصد زیادہ ہے اور یہ اقدام کسانوں کے معاشی قتل کے مترادف ہے۔

پریس کانفرنس کرتے ہوئے انہوں نے کہا کہ پنجاب میں کمرشل فارمز پر کارپوریٹ ٹیکس اور سپر ٹیکس کا نفاذ چھوٹے اور درمیانے درجے کے کاشتکاروں کو دیوار سے لگانے کی سازش ہے۔چینی کی برآمد سے پیدا ہونے والی قلت اور قیمتوں میں ہوشربا اضافہ حکومت کی مکمل نااہلی اور مافیا نوازی کا ثبوت ہے۔

(جاری ہے)

ایک طرف ملک سے 7 لاکھ 65 ہزار میٹرک ٹن چینی برآمد کر کے 112 ارب روپے کی آمدن ظاہر کی جا رہی ہے تو دوسری جانب اسی چینی کو دوبارہ مہنگے داموں درآمد کیا جا رہا ہے جس سے قومی خزانے کو اربوں روپے کا نقصان ہو رہا ہے،اس نقصان کا ازالہ عوام کیوں کریں ،یہ پیسہ ان وزیروں اور مشیروں کی جیبوں سے نکلوایا جائے جو مافیاز کے سہولت کار بنے ہوئے ہیں۔

انہوں نے کہا کہ اگر حکومت نے کسان دشمن پالیسیوں کا سلسلہ بند نہ کیا تو کسان بورڈ پورے ملک میں ایسا احتجاجی طوفان برپا کریں گے جس پر قابو پانا کسی کے بس کی بات نہیں ہوگی،ہم کسان برادری کے حقوق کے لیے کسی بھی حد تک جانے کو تیار ہیں اور ہر فورم پر حکومت کی نااہلی اور کرپشن کو بے نقاب کرتے رہیں گے۔