Live Updates

عمران خان کو بڑے بڑے مائنس کرنا چاہتے تھے مگر وہ نہیں کر سکے، بیرسٹرگوہر

بانی پی ٹی آئی نے حکم دیا تو خیبر پختونخواہ کی اسمبلی تحلیل کردیں گے، یہ بانی پی ٹی آئی کی اسمبلی ہے ان کا ووٹ ہے وہ جیسے کہیں گے ویسا ہوگا، چیئرمین پی ٹی آئی کی میڈیا سے گفتگو

فیصل علوی منگل 24 جون 2025 11:52

عمران خان کو بڑے بڑے مائنس کرنا چاہتے تھے مگر وہ نہیں کر سکے، بیرسٹرگوہر

اسلام آباد(اردوپوائنٹ اخبار تازہ ترین۔24جون 2025)پاکستان تحریک انصاف کے چیئرمین بیرسٹرگوہر علی کا کہنا ہے کہ بانی پی ٹی آئی عمران خان کو بڑے بڑے مائنس کرنا چاہتے تھے مگر وہ نہیں کر سکے، بانی پی ٹی آئی نے حکم دیا تو خیبر پختونخواہ کی اسمبلی تحلیل کردیں گے، یہ بانی پی ٹی آئی کی اسمبلی ہے ان کا ووٹ ہے وہ جیسے کہیں گے ویسا ہوگا،جوڈیشل کمپلیکس کے باہر میڈیا سے گفتگو کرتے ہوئے چیئرمین پی ٹی آئی نے کہا کہ یہ ووٹ ہمارا نہیں بلکہ بانی پی ٹی آئی عمران خان کا ہے، یہ ووٹ ہمارا نہیں بلکہ بانی پی ٹی آئی عمران خان کا ہے۔

خیبرپختونخواہ کا بجٹ پاس نہیں ہوا۔ بجٹ پاس ہونے میں ابھی بھی کچھ دن باقی ہیں۔ بانی پی ٹی آئی جو حکم کریں گے وہ ہم مانیں گے۔ اسمبلی تحلیل کا کہیں گے تو کر لیں گے۔

(جاری ہے)

اگر بانی پی ٹی آئی نہ ہوتے تو مجھے میرے خاندان والے بھی ووٹ نہ دیتے۔انہوں نے کہا کہ عدالتوں نے مایوس کیا ہے لیکن اللہ سے امید ہے کہ کہیں نہ کہیں سے تو بانی پی ٹی آئی کو انصاف ملے گا۔

بانی پی ٹی آئی کیخلاف 300 مقدمات درج ہوئے۔ جیل جانے سے پہلے وہ 350 پیشیاں بھگت چکے تھے۔ پانچ دن کے اندر بانی پی ٹی آئی کو تین سزائیں ہوئیں جس میں 45 سال کی سزا سنائی گئی۔گفتگو کے دوران بیرسٹرگوہر کا مزید یہ بھی کہنا تھا کہ بانی پی ٹی آئی کی اہلیہ کو بھی سزائیں دی گئیں۔ کتابیں تک نہیں دینے دے رہے، رولز کی خلاف ورزی کر کے ملاقاتیں نہیں کرنے دیتے۔

خیال رہے کہ اس سے قبل بھی گفتگو کرتے ہوئے پاکستان تحریک انصاف کے چیئرمین بیرسٹر گوہرکاکہناتھاکہ ہماری جیتی ہوئی سیٹوں کے مطابق مخصوص نشستیں ہمیں ملیں گی۔ ہمیں سپریم کورٹ سے توقع ہے کہ انصاف ملے گا۔ امید ہیں مخصوص نشستیں ہمیں ملیں گی۔دوسری پارٹیوں کو مال غنیمت کے طور پر مخصوص نشستیں نہیں دی جاسکتیں۔ ہم چیف جسٹس ہائیکورٹ سے ملے تھے امید ہے ہمارا کیس لگ جائے گا۔

چیف جسٹس خود ملے تھے، رہائی کیس سننے کے بعد ہوگی، امید ہے بانی پی ٹی آئی کے کیس کی تاریخ لگ جائے گی۔مخصوص نشستیں اس جماعت کا حق ہے جس کو عوام نے ووٹ دیا۔ان کا کہنا تھا کہ جہاں تک کچھ لو اور کچھ دو کی بات ہے تو لوگوں نے مس گائیڈ کیا تھا۔بانی پی ٹی آئی عمران خان بارہا کہہ چکے تھے کہ کبھی بھی ڈیل کے تحت باہر نہیں آوں گا۔ بانی پی ٹی آئی بے گناہ ہیں ہر قیمت میں رہائی ہونی چاہیے تھی۔ بانی پی ٹی آئی کے خلاف بنے تمام کیس سیاسی اور بوگس ہیں پہلے بانی پر 300 کیس بنائے گئے اور انہیں 45 سال کی سزائیں دی گئیں تھیں۔