Live Updates

ایران پر رات بھر اسرائیلی حملوں میں جوہری سائنسدان سمیت 9 افراد شہید، چار رہائشی عمارتیںتباہ

اسرائیل میں 12 دن گزرنے کے باوجود مکمل نقصانات کا اندازہ تاحال نہیں لگایا جا سکا،رپورٹ

منگل 24 جون 2025 18:22

تہران (اُردو پوائنٹ اخبارتازہ ترین - این این آئی۔ 24 جون2025ء)امریکی صدر ڈونلڈ ٹرمپ کی جانب سے اعلان کردہ جنگ بندی کے نفاذ سے قبل رات بھر ایران پر جاری رہنے والے اسرائیلی حملوں میں جوہری سائنسدان صدیقی صابر سمیت 9 ایرانی شہری شہید اور 4 رہائشی عمارتیں تباہ ہوگئیں۔خبر رساں ادارے کے مطابق ایرانی میڈیا نے منگل کو اطلاع دی ہے کہ رات کے وقت ملک کے شمالی حصے پر اسرائیلی حملے میں 9 افراد شہید ہو گئے، یہ واقعہ امریکی صدر ڈونلڈ ٹرمپ کی جانب سے ایران اور اسرائیل کے درمیان اعلان کردہ جنگ بندی کے نفاذ سے پہلے پیش آیا۔

ایرانی خبر رساں ادارے کے مطابق صوبہ گیلان کے ایک اعلیٰ عہدیدار علی باقری نے بتایا کہ اسرائیلی حملے میں 4 رہائشی عمارتیں مکمل طور پر تباہ ہو گئیں جبکہ کئی ملحقہ گھروں کو بھی دھماکوں سے نقصان پہنچا ہے۔

(جاری ہے)

ایران کے سرکاری خبر رساں ادارے کے مطابق شمالی تہران پر اسرائیلی حملے میں جوہری سائنسدان محمد رضا صدیقی صابر بھی شہید ہوگئے۔ایرانی سرکاری ٹیلی ویژن نے بتایا کہ محمد رضا صدیقی صابر کو ان کے والدین کے گھر آستانہ اشرفیہ (شمالی ایران) میں نشانہ بنایا گیا۔

رپورٹ کے مطابق محمد رضا صدیقی صابر امریکی پابندیوں کی فہرست میں شامل تھے، چند روز قبل ان کا 17 سالہ بیٹا تہران میں ان کے گھر پر حملے میں شہید ہو گیا تھا۔دریں اثنا، تہران میں رات بھر دھماکوں کا سلسلہ جاری رہا، جہاں دارالحکومت کے شمالی اور وسطی علاقوں میں ہونے والے دھماکوں کو ’اے ایف پی‘ کے صحافیوں نے اس تنازع کے آغاز کے بعد سے سب سے شدید قرار دیا۔

ایران کی وزارت صحت کے مطابق 12 روزہ جنگ کے دوران اسرائیل کے حملوں میں 400 شہری شہید ہوئے۔دوسری جانب اسرائیل میں 12 دن گزرنے کے باوجود مکمل نقصانات کا اندازہ تاحال نہیں لگایا جا سکا، کیونکہ فوجی سنسرشپ کے قوانین معلومات کی اشاعت کو محدود کر رکھا ہے، تاہم ملک بھر میں کم از کم 50 میزائل حملوں کے اثرات کی تصدیق ہو چکی ہے اور منگل کے حملوں سے پہلے سرکاری ہلاکتوں کی تعداد 24 تھی۔