تحریک انصاف کے سابق چیئرمین سے میری دوری کی وجہ ان کی اسٹیبلشمنٹ سے قربت تھی‘ جاوید ہاشمی

راولپنڈی(اُردو پوائنٹ اخبارتازہ ترین - آن لائن۔ 26 جون2025ء)سینئر سیاست دان و تحریک انصاف کے رہنما جاوید ہاشمی نے کہا ہے کہ تحریک انصاف کے سابق چیئرمین سے میری دوری کی وجہ ان کی اسٹیبلشمنٹ سے قربت تھی سابق چیئرمین کے بغیر پارٹی میں کسی کی کوئی اہمیت نہیں نہ انہیں مائینس کیا جا سکتا ہے۔ ان خیالات کا اظہار انہوں نے گزشتہ روز اڈیالہ جیل کے قریب داہگل چیک پوسٹ پر میڈیا سے گفتگو میں کیا قبل ازیں جاوید ہاشمی سابق چیئرمین سے ملاقات کے لئے جب اڈیالہ روڈ داہگل ناکے پر پہنچے تو پولیس نے جیل جانے سے روک دیا ۔

(جاری ہے)

جاوید ہاشمی نے کہا کہ میں سابق چیئرمین سے دور ہی اس وقت ہوا تھا جب وہ اسٹیبلشمنٹ کے قریب ہوئے تھے اب اسے ضرورت ہے میں اس لئے ان سے ملاقات اور اظہار یکجہتی کے لئے آیا ہوں آپ بتائیں سارے اختیارات ساری طاقت اسٹیبلشمنٹ کے پاس ہے سیاست دان کے پاس تو کچھ نہیں ہے تو بات تو وہ بات بھی اسٹیبلشمنٹ سے ہی کرے گا جب ان سے پوچھا گیا کہ آرمی چیف جنگ جیت گئے فیلڈ مارشل بن گئے عالمی طاقتوں کی جانب سے زبردست پزیرائی بھی مل گئی وہ تو بہت طاقتور ہو گئے اب وہ کیوں بات سنیں گے تو انہوں نے جواب دیا کہ جی جنگ جیت گئے ہیں طاقتور بھی ہو گئے ہیں آپ دیکھ لیں مشرف بھی اپنے دور میں طاقتور تھا تورا بورا کے بعد پرویز مشرف طاقتور ہو گیا تھا اس وقت سابق امریکی صدر کلنٹن بھی پاکستان 15 منٹ کے لئے ایا تھا وہ تو کہتا تھا کہ میں جب تک یہ وردی نہیں اتارتے میں ان سے ملاقات نہیں کروں گا ہاں فیلڈ مارشل ابھی طاقتور ہیں تو پھر آپ بتائیں ہم بات کس سے کریں انہی سے کرنی ہے جن کے پاس طاقت ہے سابق چیئرمین کو مائنس کرنے کے حوالے سے سوال پر انہوں نے کہا نہیں کوئی مائنس نہیں ہوا یہ اندر کی بات ہے انٹرنل معاملہ ہے سابق چیئرمین کے بغیر پارٹی کچھ نہیں اور کسی کی کوئی اہمیت نہیں انہیں کوئی مائنس نہیں کر سکتا جب ان سے پوچھا گیا کہ کیا آپ کوئی خاص پیغام لے کے آئے ہیں کیوں ائے ہیں تو انہوں نے کہا کہ میں اس حالت میں بھی آیا ہوں اس لئے کہ میں سابق چیئرمین سے اظہار یکجہتی کے لئے آیا ہوں ملنے کے لئے آیا ہوں کیونکہ اسے ہماری ضرورت ہے آپ سب جانتے ہیں میری جمہوریت کے لئے بہت بڑی جدوجہد ہے اور میں ہمیشہ جمہوریت کی ہی بات کرتا ہوں۔