حج 2026 کے لیے عازمین کی لازمی رجسٹریشن شروع ‘9 جولائی تک جاری رہے گی

جمعہ 27 جون 2025 20:15

اسلام آباد(اُردو پوائنٹ اخبارتازہ ترین - آن لائن۔ 27 جون2025ء)حج 2026 کے لیے عازمین کی لازمی رجسٹریشن شروع کر دی گئی ہے۔ عازمین حج کی رجسٹریشن 9 جولائی تک جاری رہے گی جس کی بنیاد پر سعودی عرب کی حکومت پاکستان کیلئے کوٹہ مقرر کرے گی۔وزارت مذہبی امور کے مطابق حج رجسٹریشن کے لیے کوئی فیس ادا نہیں کرنی ہوگی۔ حج 2026 کے لیے قبل از وقت رجسٹریشن کرانا لازمی ہے۔

سرکاری اور نجی دونوں اسکیموں کے لیے عازمین حج کی رجسٹریشن کرانا لازمی ہے۔بیرون ملک مقیم پاکستانیوں کے لیے بھی رجسٹریشن کرانا لازمی ہے۔

(جاری ہے)

رجسٹریشن کروانے والے درخواست گذار ہی حج 2026 کے اہل تصور ہوں گے۔ حج رجسٹریشن ملک بھر میں منظور شدہ 15 بینکوں سے کرائی جا سکتی ہے۔حج رجسٹریشن کے بعد عازمین سرکاری یا نجی حج سکیم منتخب کر سکیں گے۔

رواں برس پرائیویٹ سکیم سے رہ جانے والے عازمین کے لیے بھی رجسٹریشن لازمی ہو گی ۔حج 2026 کے اخراجات اور دیگر شرائط و ضوابط حج پالیسی کے مطابق الگ سے جاری کیے جائیں گے۔حج رجسٹریشن حکومت سعودی عرب کی ہدایت پر کی جا رہی ہے۔وزارت مذہبی امورکے مطابق حج رجسٹریشن کے اعداد و شمار سے سعودی حکومت کو آگاہ کیا جائے گا۔رجسٹریشن کی بنیاد پر حکومت سعودی عرب حج کوٹہ مقرر کرے گی۔