نئے انٹرنیشنل سیزن کی تیاری کیلئے ویمنز کرکٹرز کی نیشنل کرکٹ اکیڈمی میں ٹریننگ

جمعہ 27 جون 2025 19:45

لاہور (اُردو پوائنٹ اخبارتازہ ترین - این این آئی۔ 27 جون2025ء) نئے انٹرنیشنل سیزن کی تیاری کے لیے پاکستان کی خواتین کرکٹرز کی آف سیزن میں بھی نیشنل کرکٹ اکیڈمی میں ٹریننگ جاری ہے۔ٹریننگ کا مقصد آنے والے سیزن سے قبل مہارت میں اضافہ اور فٹنس پر توجہ دینا ہے، پاکستان ویمنز ٹیم کا اگلا بین الاقوامی اسائنمنٹ دورہ آئرلینڈ ہے۔آئرلینڈ کے دورے میں پاکستان ویمنز ٹیم 6سے 10اگست تک ڈبلن میں تین میچوں کی ٹی ٹونٹی سیریز کھیلے گی۔

پاکستان ویمنز ٹیم 30ستمبر سے 2نومبر تک ہونے والے آئی سی سی ویمنز کرکٹ ورلڈ کپ میں بھی حصہ لے گی، پاکستان ویمنز ٹیم اپنے تمام میچ سری لنکا میں کھیلے گی۔آل رائونڈر عالیہ ریاض نے کہا کہ ہماری کوشش ہے کہ پاکستان کی بہترین نمائندگی کریں۔سپنر نشرہ سندھو نے کہا کہ سعدیہ اقبال کے عالمی ٹی ٹوئنٹی رینکنگ میں سرفہرست ہونے سے ٹیم کے اندر حوصلہ افزائی کی ایک نئی لہر آئی ہے۔

(جاری ہے)

نشرہ سندھو نے کہا کہ یہ ہم سب کے لیے ایک قابل فخر لمحہ ہے کہ ہم اپنی ٹیم کی ساتھیوں میں ہر ایک کو یہ سنگ میل حاصل کرتے ہوئے دیکھیں۔سعدیہ اقبال نے کہا کہ میں دبا میں بھی پرسکون رہ کر پرفارمنس دینے کی کوشش کرتی ہوں، میں اپنی بولنگ کی مہارت کو بہتر بنانے کے لیے کوچ عبدالرحمان کے ساتھ کام کر رہی ہوں۔انہوں نے کہا کہ کیمپ میں مینز کرکٹرز کے ساتھ ٹریننگ نے میری بولنگ میں مزید نکھار لانے میں اہم کردار ادا کیا ہے۔