Live Updates

8 فروری کو ہمارا مینڈیٹ چوری ہوا، باقی پر بھی ڈاکہ ڈالا گیا، شیخ وقاص اکرم

ملک میں آئین اور انصاف نہیں ، مخصوص نشستوں کو مال غنیمت سمجھ کر تقسیم کیا گیا، رہنماء پی ٹی آئی

منگل 1 جولائی 2025 03:15

اسلام آباد (اُردو پوائنٹ اخبارتازہ ترین - این این آئی۔ 01 جولائی2025ء) رہنماء پی ٹی آئی شیخ وقاص اکرم نے کہا کہ ہمارا ایک مینڈیٹ 8فروری 2024ء کو چوری ہوا، ہمارے باقی کے مینڈیٹ پر بھی ڈاکہ ڈالا گیا ہے۔جاری بیان میں شیخ وقاص اکرم نے کہا کہ مخصوص نشستوں کو دیکھیں تو اس کا ایک پس منظر ہے، ملک میں آئین اور انصاف نہیں ہے، مخصوص نشستوں کو مال غنیمت سمجھ کر تقسیم کیا گیا۔

انہوں نے کہا کہ پوری قوم کی امنگوں کو گھونٹ دیا گیا ہے، یہ وہ پاکستان ہے جس میں سچ بولنا جرم بن چکا ہے، ہم ایسی ریاست میں ہیں جہاں نظام مفلوج ہوچکا ہے۔انہوں نے کہا کہ سندھ ہاس میں بے ضمیروں کی منڈیاں لگیں، خرید و فروخت ہوئی، بانی پی ٹی آئی نے جمہوری مزاحمت کی۔شیخ وقاص اکرم نے کہا کہ پی ٹی آئی نے 180 سیٹیں جیتیں لیکن 17سیٹوں والی جماعت کو 110سیٹیں دے کر حکومت پکڑا دی، آج سارے کا سارا عدالتی نظام تباہ ہوچکا ہے۔

(جاری ہے)

پی ٹی آئی رہنماء نے کہا کہ بانی پی ٹی آئی سے ملاقات نہیں کرائی جاتی، اڈیالہ جیل کے باہر شام 4بجے تک روکے رکھتے ہیں پھر کہتے ہیں وقت ختم ہوگیا۔انہوں نے کہا کہ بہت ضروری ہے کہ بانی سے ملاقاتیں بحال کی جائیں، ہم تمام آئینی و قانونی فورمز استعمال کرتے رہیں گے، دنیا دیکھ رہی کہ پاکستان کے سب سے بڑے لیڈر کے ساتھ کیا ہو رہا ہے۔شیخ وقاص اکرم نے کہا کہ پنجاب اسمبلی میں بجٹ کے دوران ہمارے اراکین اسمبلی نے احتجاج کیا، ہمارے 26لوگوں پر پابندی لگا دی گئی، اپوزیشن کے 10لوگوں پر 20لاکھ روپے جرمانہ کر دیا گیا۔رہنما پی ٹی آئی ے کہا کہ ہمارے ایم پی ایز 9مئی سے لے کر آج تک دہشت گردی کے پرچے برداشت کر رہے ہیں، سپیکر پنجاب اسمبلی کے رویے کی مذمت کرتے ہیں۔