شیخ حسینہ واجد نے انسانیت کے خلاف جرائم کے الزامات کی تردید کر دی

شیخ حسینہ کی کالعدم سیاسی جماعت عوامی لیگ نے مقدمے کو شو ٹرائل قرار دے دیا

بدھ 2 جولائی 2025 15:41

ڈھاکا(اُردو پوائنٹ اخبارتازہ ترین - این این آئی۔ 02 جولائی2025ء)بنگلہ دیش کی سابق وزیراعظم شیخ حسینہ واجد نے اپنے اوپر لگنے والے انسانیت کے خلاف جرائم کے الزامات کو بے بنیاد اور سیاسی انتقام قرار دے دیا ہے۔

(جاری ہے)

میڈیارپورٹس کے مطابق شیخ حسینہ، جو طلبہ بغاوت کے بعد بھارت فرار ہو گئی تھیں، پر ڈھاکا کی عدالت میں 1 جون 2025 سے پانچ سنگین الزامات کے تحت مقدمہ چل رہا ہے، جن میں اکسانا، سہولت کاری، اجتماعی قتل اور کمان کی ذمہ داری میں ناکامی شامل ہیں۔

ان کی جماعت، کالعدم عوامی لیگ نے ایک بیان میں مقدمے کو شو ٹرائل قرار دیا ہے اور کہا ہے کہ حسینہ ان تمام الزامات کو سختی سے مسترد کرتی ہیں۔استغاثہ کے مطابق، حسینہ پر ہیلی کاپٹر حملوں کا حکم دینے، مظاہرین پر مہلک ہتھیاروں کے استعمال، اور جلا گھیرا کی اجازت دینے جیسے الزامات بھی عائد ہیں۔ ان پر تین مخصوص کیسز میں براہ راست کمانڈ کی ذمہ داری کا دعوی کیا گیا ہے۔