سندھ کا ترقیاتی بجٹ عوامی زندگی کو بہتر بنانے کا ویژن ہے،صوبائی وزیر اطلاعات ، ٹرانسپورٹ و ماس ٹرانزٹ

کراچی (اُردو پوائنٹ اخبارتازہ ترین - اے پی پی۔ 02 جولائی2025ء) سندھ کے سینئر وزیر اور صوبائی وزیر برائے اطلاعات، ٹرانسپورٹ و ماس ٹرانزٹ شرجیل انعام میمن نے کہا ہے کہ سندھ حکومت کا ترقیاتی بجٹ صرف رقم کی تقسیم نہیں بلکہ عوامی زندگی کو بہتر بنانے کا ایک ویژن ہے۔ انہوں نے بیان میں کہا کہ 26۔2025 کا ترقیاتی بجٹ پاکستان پیپلز پارٹی کی عوام دوست پالیسیوں، چیئرمین بلاول بھٹو اور صدر آصف علی زرداری کے ویژن کا تسلسل ہے۔

انہوں نے کہا کہ 1.018 ٹریلین روپے کا تاریخ ساز ترقیاتی بجٹ پیش کر کے ثابت کر دیا کہ ہم صرف وعدے نہیں کرتے بلکہ عملی کام پر یقین رکھتے ہیں، سندھ حکومت نے مالی سال 26۔2025 کے لیے عوامی ضروریات اور دیرینہ مسائل کو مدِنظر رکھتے ہوئے اہم ترقیاتی منصوبوں کو بجٹ کا حصہ بنایا۔

(جاری ہے)

انہوں نے کہا کہ ڈویژنل ہیڈکوارٹرز حیدرآباد، سکھر، لاڑکانہ، میرپورخاص اور شہید بینظیرآباد کے لیے 7، 7 ارب روپے کا ترقیاتی پیکیج فراہم کیا ہے، ڈویژنل ہیڈکوارٹرز میں سڑکوں کی بہتری، واٹر سپلائی، نکاسی آب ، تعلیم، صحت اور دیگر شہری سہولیات کے منصوبے مکمل کئے جائیں گے۔

شرجیل انعام میمن نے کہا کہ کراچی میں کورنگی کازوے پل کی تعمیر، شاہراہِ بھٹو کی توسیع اور سیف سٹی منصوبے کا دائرہ کار بڑھانا حکومتی ترجیحات میں ہیں، سندھ میں پانی کی فراہمی اور نکاسی آب کے لیے نمایاں اقدامات کئے گئے، حب کینال کی بحالی کے لئے 3.1 ارب روپے، شہدادکوٹ واٹر سپلائی سکیم کے لئے 2 ارب روپے رکھے گئے۔ انہوں نے کہا کہ کراچی میں 5 ایم جی ڈی سمندری پانی کو میٹھا بنانے والا پلانٹ اور ٹی پی 4 سیوریج ٹریٹمنٹ پلانٹ جیسے منصوبے عالمی اداروں کے تعاون سے مکمل کئے جائیں گے، 2 لاکھ کسانوں کی مالی معاونت کے ساتھ زراعت کے شعبے میں 33 ارب روپے کی لاگت سے میکانائزیشن پیکج، ڈرپ اریگیشن سسٹم اور ہارٹی کلچر کلسٹرز متعارف کروائے جا رہے ہیں۔

شرجیل انعام میمن نے کہا کہ سندھ پیپلز ہاؤسنگ سکیم کے تحت سیلاب متاثرین کے لیے 21 لاکھ گھروں کی تعمیر جاری ہے جن کے مالکانہ حقوق خواتین کو دے کر انہیں بااختیار بنایا جا رہا ہے، مختلف صلاحیتوں کے حامل افراد کو سہولیات کی فراہمی، مالی امداد اور بحالی کے لیے 21.7 ارب روپے رکھے گئے ہیں۔ کل 3,642 منصوبوں میں 3,161 جاری سکیمیں اور 481 نئی سکیمیں شامل ہیں جبکہ 119.5 ارب روپے خصوصی ترقیاتی اقدامات کے لئے رکھے گئے۔