حق کے لئے جدوجہد کرنا کربلا کا ناقابل فراموش درس ہے‘ ذیشان رفیق

دین اسلام کی سربلندی کیلئے امام حسین کا جہاد انسانی تاریخ کا سنہری باب ہے‘ وزیر بلدیات

ہفتہ 5 جولائی 2025 18:38

لاہور (اُردو پوائنٹ اخبارتازہ ترین - این این آئی۔ 05 جولائی2025ء)وزیر بلدیات پنجاب ذیشان رفیق نے یوم عاشور پر اپنے پیغام میں کہا ہے کہ 10 محرم الحرام حضرت امام حسین اور ان کے عالی قدر رفقا کی عظیم شہادت کا دن ہے۔ اس بات میں کوئی شک نہیں کہ حق کے لئے جدوجہد کرنا کربلا کا ناقابل فراموش درس ہے۔ وزیر بلدیات نے کہا کہ دین اسلام کی سربلندی کیلئے امام حسین کا جہاد انسانی تاریخ کا سنہری باب ہے۔

(جاری ہے)

انہوں نے کہا کہ واقعہ کربلا مظلوموں کا ساتھ دینے کا بھی سبق دیتا ہے۔ ذیشان رفیق نے ملک کے موجودہ حالات کی طرف اشارہ کرتے ہوئے یہ بھی کہا کہ فرقہ واریت پاکستان کے لئے زہر قاتل ہے۔ آج کے دن ہمیں فرقہ واریت کے خاتمے کے عزم کا اعادہ کرنا چاہیئے۔ انہوں نے زور دیا کہ پاکستان کو بین العقائد ہم آہنگی کا گہوارہ بنانا وقت کی ضرورت ہے۔ ہم سب کو مل کر امن دشمن عناصر کو شکست دینا ہوگی۔ صرف اسی صورت میں پاکستان ترقی اور خوشحالی کی منزل سے ہمکنار ہو سکتا ہے۔