امام حسینؓ واہل بیتؓ کی عظیم قربانی اسلام کی سربلندی، عدل کے قیام ،ظلم و جبر کے خاتمے کی روشن مثال ہے، چوہدری انوارالحق

ہفتہ 5 جولائی 2025 22:19

مظفر آباد (اُردو پوائنٹ اخبارتازہ ترین - این این آئی۔ 05 جولائی2025ء)وزیراعظم آزاد جموں و کشمیر چوہدری انوارالحق نے کہا ہے کہ حضرت امام حسینؓ اور ان کے اہل بیتؓ کی عظیم قربانی اسلام کی سربلندی، عدل کے قیام اور ظلم و جبر کے خاتمے کی روشن مثال ہے۔ یومِ عاشورہ کے موقع پر اپنے خصوصی پیغام میں وزیراعظم آزادکشمیر نے کہا کہ خانوادہ رسالت ؐ نے میدانِ کربلا میں جس ثابت قدمی اور قربانی کا مظاہرہ کیا، وہ رہتی دنیا تک مظلوموں کیلئے مشعلِ راہ رہے گا۔

انہوں نے کہا کہ واقعہ کربلا تاریخِ اسلام کا ایک ناقابلِ فراموش باب ہے، جہاں امام عالی مقامؓ اور ان کے جانثاروں نے دین کی بقا کیلئے اپنی جانوں کا نذرانہ پیش کیا۔ ان کا واضح مقصد عدل و حق کا قیام اور ظلم کا خاتمہ تھا۔

(جاری ہے)

وزیراعظم چوہدری انوارالحق نے کہا کہ آج مقبوضہ جموں و کشمیر کے عوام بھی حسنیت کے نقشِ قدم پر چل کر بھارت کے غاصبانہ قبضے کے خلاف جدوجہد کر رہے ہیں۔

کشمیری نوجوان اپنے سے کئی گنا بڑے دشمن کے سامنے جرات و استقامت کے ساتھ ڈٹے ہوئے ہیں، اور اپنی جانوں کا نذرانہ پیش کر کے رسم شبیری ادا کر رہے ہیں۔وزیراعظم آزادکشمیر چوہدری انوارالحق نے بھارتی حکومت کی جانب سے مقبوضہ کشمیر میں محرم الحرام کے جلوسوں پر پابندی اور عاشورہ کے موقع پر کرفیو کے نفاذ کو مذہبی آزادی پر کھلا حملہ قرار دیتے ہوئے کہا کہ مودی حکومت کشمیری مسلمانوں کے بنیادی انسانی حقوق سلب کر رہی ہے۔

وزیراعظم آزاد کشمیر نے عالمی انسانی حقوق کی تنظیموں سے مطالبہ کیا کہ وہ بھارتی حکومت کی فسطائیت اور مذہبی جبر کا نوٹس لیں۔ ان کا کہنا تھا کہ جب تک مقبوضہ جموں و کشمیر کا ہر گوشہ بھارتی تسلط سے آزاد نہیں ہو جاتا، کشمیری قوم اپنے حسینی عزم کے ساتھ جدوجہد جاری رکھے گی۔