وفاقی وزیر خزانہ کی زیر صدارت وزیر اعظم کے پنکھا تبدیلی پروگرام پر جائزہ اجلاس

پیر 7 جولائی 2025 23:01

آسلام آباد (اُردو پوائنٹ اخبارتازہ ترین - آن لائن۔ 07 جولائی2025ء) وفاقی وزیر خزانہ کی زیر صدارت وزیر اعظم کے پنکھا تبدیلی پروگرام پر جائزہ اجلاس وفاقی وزیر برائے خزانہ سینیٹر محمد اورنگزیب کی زیر صدارت منعقد ہوا اجلاس میں وزیر اعظم کے پنکھا تبدیلی پروگرام اور اس کے جلد اجرا کے حوالے سے تیاریوں کا جائزہ لیا گیا۔اجلاس میں وفاقی وزیر برائے توانائی سردار اویس احمد خان لغاری، گورنر اسٹیٹ بینک آف پاکستان، چیئرمین پاکستان بینکس ایسوسی ایشن، اور وزارتِ خزانہ، وزارتِ توانائی سمیت متعلقہ اداروں کے سینئر حکام نے شرکت کی۔

اجلاس میں وزیر خزانہ اور شرکائ کو نیشنل انرجی ایفشینسی اور کنزرویشن اتھارٹی کی جانب سے پروگرام کی عملی تیاریوں اور متوقع آغاز سے متعلق تفصیلی بریفنگ دی گئی۔

(جاری ہے)

بینکوں کے ساتھ معاہدوں کی تکمیل، بینکنگ سسٹمز کے انضمام، اور نیشنل انفارمیشن ٹیکنالوجی کمپنی اور پنجاب انفارمیشن ٹیکنالوجی بورڈ کی فنی معاونت اور سلوشنز کے ذریعے عمل درآمد کو تیز کرنے جیسے اہم نکات کا تفصیلی جائزہ لیا گیا۔

سینیٹر محمد اورنگزیب نے وزیر اعظم کی اس منصوبے پر خصوصی توجہ کو اجاگر کرتے ہوئے کہا کہ یہ پروگرام توانائی کی بچت، مالی شمولیت کے فروغ اور معیشت کے استحکام میں اہم کردار ادا کرے گا۔ اٴْن کا کہنا تھا کہ اس سے صارفین کے رویے میں مثبت تبدیلی آئے گی، بجلی کی کھپت میں کمی ہوگی اور مجموعی طور پر ملکی معیشت کو فائدہ پہنچے گا۔وزیر خزانہ نے تمام اسٹیک ہولڈرز، خصوصاً بینکاری شعبے کی بھرپور شرکت اور تعاون کو سراہا اور ہدایت دی کہ آئندہ دو سے تین ہفتوں میں تمام ضروری اقدامات مکمل کیے جائیں تاکہ مہینے کے اختتام تک پروگرام کے پہلے مرحلے کا تیار بینکوں کی شمولیت کے ساتھ آغاز ممکن بنایا جا سکے۔۔