اسٹیبلشمنٹ کی مداخلت نے انتخابی نظام کا حلیہ بگاڑ دیا، سیٹیں چھین کر من پسند لوگوں میں بانٹی جاتی ہیں

جمہوریت کے نام پر ملک پر ظلم و جبر کا نظام مسلط ہے، فارم47 کی ایجاد نے عوام سے رائے دہی کا حق چھین لیا اوراس کی بنیاد پر بنائی گئی جعلی حکومت نے عام آدمی کی زندگی اجیرن کردی ہے۔امیر جماعت اسلامی حافظ نعیم الرحمن

ثنااللہ ناگرہ پیر 7 جولائی 2025 19:44

اسٹیبلشمنٹ کی مداخلت نے انتخابی نظام کا حلیہ بگاڑ دیا، سیٹیں چھین کر ..

لاہور (اُردو پوائنٹ اخبارتازہ ترین۔ 07 جولائی 2025ء) امیر جماعت اسلامی حافظ نعیم الرحمن نے کہا ہے کہ جمہوریت کے نام پر ملک پر ظلم و جبر کا نظام مسلط ہے۔ فارم 47 کی ایجاد نے عوام سے رائے دہی کا حق چھین لیا اوراس کی بنیاد پر بنائی گئی جعلی حکومت نے عام آدمی کی زندگی اجیرن کردی ہے۔ جماعت اسلامی عوامی طاقت سے ظلم کے اس نظام کا خاتمہ کرے گی۔ ہماری سیاست گالی، گولی، تعصب اور نفرت کی سیاست نہیں ہے۔

ان خیالات کا اظہار انہوں نے منصورہ میں مرکزی تربیت گاہ کے شرکاء سے خطاب کرتے ہوئے کیا۔

امیر جماعت اسلامی نے کہا کہ اسٹیبلشمنٹ کی مداخلت نے انتخابی نظام کاحلیہ بگاڑ دیا ہے۔سیٹیں چھینی اور من پسند لوگوں میں بانٹی جاتی ہیں۔ دھونس اور دھاندلی سے جاگیردار،وڈیرے اور سرمایہ دار اقتدار کے ایوانوں پر قابض ہو کر عوام کا خون چوس رہے ہیں۔

(جاری ہے)

کروڑوں اور اربوں روپے کے اشتہارات دیکر ترقی و خوشحالی کے جھوٹے دعوے کرنا اور لوگوں کی آنکھوں میں دھول جھونکناحکمرانوں کا پسندیدہ مشغلہ بن چکاہے۔

حافظ نعیم الرحمن نے کہا کہ پیپلز پارٹی،ن لیگ ہو یا پی ٹی آئی سب اسٹیبلشمنٹ کے مہرے ہیں۔باجوہ کو ایکسٹیشن دینے،شراب کے پرمنٹ بانٹنے اور اپنی تنخواہوں میں اضافے کیلئے یہ سب اکٹھے ہوجاتے ہیں مگر غزہ و کشمیر میں ہونے والے ظلم پرسب خاموش ہو جاتے ہیں۔

غزہ میں اسرائیل نے ہزاروں معصوم فلسطینیوں کا قتل عام کیا مگر حکومت کی طرف سے اس ظلم کو رکوانے کیلئے کوئی عملی قدم نہیں اٹھایا گیا۔حکمرانوں کا کام مذمت کرنا نہیں بلکہ اقدامات اٹھانا ہوتا ہے مگر ہمارے حکمران تو امریکہ کے خوف سے کھل کر مذمت بھی نہیں کررہے۔انہوں نے کہا کہ جرأت و حمیت سے عاری حکمران غزہ میں جاری مسلم کشی پر خاموش تماشائی بنے ہوئے ہیں۔

امیر جماعت اسلامی نے کہا کہ بلوچ، سندھی، پختون اور پنجابی ہر کوئی حکمرانوں کے ظلم کا شکار ہے۔ جماعت اسلامی ظلم و جبر اور فساد کی جگہ قرآن و سنت کے منصفانہ نظام کے قیام کی جدوجہد کررہی ہے۔انتخابات پُرامن انقلاب کا ایک ذریعہ ہیں۔جماعت اسلامی ملک میں آئین و دستور کی بالا دستی اور قانون کی حکمرانی چاہتی ہے۔اس مقصد کے حصول کیلئے ہم قوم کو فروعی اختلافات سے نکال کر اتحاد و یکجہتی کیلئے کوشا ں اور سیاسی عمل کو آگے بڑھانا چاہتے ہیں۔

عوام نے فارم 47 کی جعلی حکومت کو تسلیم نہیں کیا۔ ہم نے عوام کی اس حق تلفی کی پرزور مذمت کی اور اس کے خلاف ہر سطح پر احتجاج کیا۔مخصوص نشستوں کے ظالمانہ فیصلے کی مذمت کرتے ہوئے ہم نے یہ سیٹیں پی ٹی آئی کو دینے کا مطالبہ کیا مگر مقتدر ٹولہ کسی آئین و قانون کو خاطر میں نہ لاتے ہوئے ملک کو بند گلی میں دھکیلنے پر تلا بیٹھا ہے۔