حریت رہنمائوں کا نوجوان رہنما برہان وانی کو 9ویں یوم شہادت پر خراج عقیدت ، کشمیری شہدا کے مشن کو جاری رکھنے کے عزم کا اعادہ کیا

منگل 8 جولائی 2025 13:56

سرینگر (اُردو پوائنٹ اخبارتازہ ترین - اے پی پی۔ 08 جولائی2025ء) بھارت کےغیر قانونی زیرتسلط جموں و کشمیر میں کل جماعتی حریت کانفرنس کے رہنماؤں نے معروف نوجوان رہنما برہان مظفر وانی اور ان کے ساتھیوں کو ان کے 9ویں یوم شہادت پر خراج عقیدت پیش کرتے ہوئے شہدا کے مشن کو ہر قیمت پر جاری رکھنے کے کشمیریوں کے عزم کا اعادہ کیا ہے۔کشمیر میڈیا سروس کے مطابق بھارتی فوجیوں نے برہان وانی کو8 جولائی 2016 کو ضلع اسلام آباد کے علاقے کوکر ناگ میں دو ساتھیوں کے ہمراہ ایک جعلی مقابلے میں شہید کیا تھا۔

برہان وانی کے ماورائے عدالت قتل کے بعد پورے مقبوضہ علاقے میں ایک زبردست عوامی احتجاجی تحریک شروع ہوگئی تھی جس کے دوران قابض فوجیوں نے گولیوں، پیلٹ گنز اور آنسو گیس کا اندھا دھند استعمال کرکے 150سے زائد پرامن مظاہرین کو شہید کردیاتھا۔

(جاری ہے)

کل جماعتی حریت کانفرنس کے رہنماؤں بشمول حریت ترجمان ایڈووکیٹ عبدالرشید منہاس ، محمد حسیب وانی ، مولانا مصعب ندوی ،فیاض حسین جعفری ، سید سبط شبیر قمی اورایڈووکیٹ امیتاز احمد نے سرینگر میں جاری اپنے بیانات میں تحریک آزادی میں نئی روح پھونکنے پر برہان وانی کو خراج عقیدت پیش کیا ۔

انہوں نے کہاکہ کشمیریوں کے دلوں میں شہید برہان وانی کاخصوصی مقام ہے ۔حریت رہنمائوں نے کہا کہ برہان وانی اور دیگر کشمیری نوجوانوں کی قربانیاں تحریک آزادی کشمیرکا بیش قیمت اثاثہ ہیں اور یہ کشمیری عوام کا فرض ہے کہ وہ ان قربانیوں کی حفاظت کریں اوربھارتی قبضے سے آزادی کے شہدا کے مشن کے حصول تک اپنی پرامن جدوجہد جاری رکھیں۔ انہوں نے زور دیا کہ خطے میں پائیدار امن کا انحصار اقوام متحدہ کی قراردادوں اور کشمیری عوام کی امنگوں کے مطابق دیرینہ تنازعہ کشمیر کے منصفانہ حل پر ہے۔

انہوں نے کشمیریوں کے جذبات کو کچلنے کے بھارت کے مذموم عزائم کو مسترد کرتے ہوئے کہا کہ شہدا کی قربانیوں سے کشمیریوں کاجذبہ حریت مزید مضبوط ہوتا ہے۔حریت رہنمائوں نے کہا کہ جموں و کشمیرمیں ایک دن ضرورآزادی کا سورج طلوع ہو گا اور کشمیری عوام بھارتی تسلط سے آزادی حاصل کر لیں گے ۔ انہوں نے کہا کہ برہان وانی کی لازوال قربانی کشمیری نوجوانوں کو ہمیشہ متاثر کرتی رہے گی ۔