رکن قومی اسمبلی رانا ارادت شریف خان کی زیر صدارت قومی اسمبلی کی قائمہ کمیٹی برائے پارلیمانی امور کا اجلاس

اسلام آباد (اُردو پوائنٹ اخبارتازہ ترین - اے پی پی۔ 08 جولائی2025ء) قومی اسمبلی کی قائمہ کمیٹی برائے پارلیمانی امور کا اجلاس منگل کو پارلیمنٹ ہاؤس میں رانا ارادت شریف خان ایم این اے کی زیر صدارت منعقد ہوا۔ اجلاس میں کمیٹی کے ارکان سمیت متعلقہ سرکاری اداروں کے حکام نے شرکت کی۔ کمیٹی کو پاکستان ٹیلی کمیونیکیشن اتھارٹی (پی ٹی اے) اور نیشنل سائبر کرائم انویسٹی گیشن ایجنسی (این سی سی آئی اے ) سے گستاخانہ مواد کی تشہیر میں ملوث ویب سائٹس کے خلاف جاری کریک ڈاؤن کے بارے میں تفصیلی بریفنگ میں چیئرمین پاکستان ٹیلی کمیونیکیشن اتھارٹی (پی ٹی اے)نے بتایا کہ پی ٹی اے اپنے مینڈیٹ کو( پی ای سی اے)پریونشن آف الیکٹرانک کرائمز ایکٹ 2016 کے سیکشن 37 (1) کے تحت چلاتا ہے۔

دیئے گئے مینڈیٹ کو پورا کرنے کے لئے پی ٹی اے نے عام لوگوں کے لئے شکایت درج کرانے کے متعدد میکانزم تیار کئے ہیں اور ساتھ ہی ان کی شکایات کے دائرہ کار کے لئے سرکاری تنظیموں کے دائرہ کار میں بھی کام کیا ہے۔

(جاری ہے)

گستاخانہ مواد کی رپورٹنگ کے لئے ایک ای میل بھی قائم کی گئی ہے اور اخبارات اور ڈیجیٹل میڈیا کے ذریعے اس کی تشہیر کی جاتی ہے۔ انٹرنیٹ پر قابل اعتراض مواد کو بلاک کرنے کے لئے ایک ٹیکنیکل سسٹم بھی استعمال کیا جا رہا ہے۔

اس نظام کو ویب مواد کو بلاک کرنے کے لئے استعمال کیا جا رہا ہے جس میں توہین مذہب، جوا، فحش نگاری اور ریاست مخالف مواد سے متعلق ایپلی کیشنز شامل ہیں۔ موصول ہونے والی شکایات اور فعال نقطہ نظر کی بنیاد پر، پی ٹی اے نے مختلف ویب سائٹس، ایپس اور سوشل میڈیا پلیٹ فارمز پر اپ لوڈ کیے گئے گستاخانہ مواد کے105296 یو آر ایل کو بلاک کر دیا ہے۔ نیشنل سائبر کرائم انویسٹی گیشن ایجنسی (این سی سی آئی اے ) کے ایڈیشنل ڈائریکٹر نے کمیٹی کو بریفنگ دی کہ این سی سی آئی اے آن لائن گستاخانہ مواد کی تشہیر کے خلاف سرگرم عمل ہے۔

کوششوں میں ایسی سرگرمیوں کو روکنے کے لئے پتہ لگانے، قانونی کارروائی اور پالیسی کی سفارشات شامل ہیں۔ ایجنسی نے خاص طور پر متعدد افراد کو گرفتار کیا ہے۔ 12 افراد کو ٹرائل کورٹس سے سزائیں ملی ہیں۔ نیشنل سائبر کرائم انویسٹی گیشن ایجنسی ، پاکستان ٹیلی کمیونیکیشن اتھارٹی (پی ٹی اے) کے ساتھ مل کر گستاخانہ سمجھے جانے والے مواد کو بلاک یا ہٹانے کے لئے کام کرتی ہے۔

مثال کے طور پر، 2021-2024 میں توہین آمیز مواد رکھنے کی وجہ سے 1314 اکاؤنٹس کو بلاک کیا گیا۔ اس سلسلے میں ایف آئی اے نے ملک بھر میں اپنے 15 سائبر کرائم یونٹس کے اندر انسدادِ توہینِ رسالت سیل قائم کیے ہیں۔ یہ سیل سائبر کرائم ٹیکنالوجی کا استعمال کرتے ہوئے مجرموں کا سراغ لگانے اور پکڑنے کے لئے رپورٹس موصول ہونے پر فوری کارروائی کرتے ہیں۔

چیئرمین کمیٹی نے اس بات پر زور دیا کہ توہین رسالت، خاص طور پر حضور نبی اکرم صلی اللہ علیہ وآلہ وسلم کی شان میں گستاخی کے لئے زیرو ٹالرنس ہونی چاہئے اور ذمہ داروں کے خلاف سخت اور فیصلہ کن کارروائی کا مطالبہ کیا۔ کمیٹی نے اس بات پر بھی اتفاق کیا کہ حضور نبی اکرم صلی اللہ علیہ وآلہ وسلم کی کسی بھی قسم کی توہین قطعی طور پر ناقابل قبول ہے اور اس سے پختہ عزم کے ساتھ نمٹا جانا چاہیے۔

مزید برآں، کمیٹی نے اس بات پر زور دیا کہ اقلیتی برادریوں کا تحفظ بھی اہم ہے اور اسے بھی سنجیدگی کے ساتھ یقینی بنایا جانا چاہیے۔سیکرٹری پارلیمانی امور نے کمیٹی کو صوبائی شکایات کے ازالے کے نظام کے انضمام کے عمل پر بریفنگ دی انہوں نے کہا کہ آزاد جموں و کشمیر اور گلگت بلتستان کو وزیراعظم کے سٹیزن پورٹل (PCP) کے ساتھ جوڑا گیا ہے اس انضمام کا مقصد کوآرڈینیشن کو بہتر بنانا، شکایت کے حل کو ہموار کرنا، اور ایک متحد، شفاف، اور موثر طریقہ کار قائم کرنا ہے۔