پاکستان کو کیش لیس معیشت بنانا وزیراعظم کا وژن ہے،ڈیجیٹل ادائیگیوں کا فروغ جدید معیشت کی ضرورت ہے،وفاقی وزیر شزا فاطمہ

بدھ 9 جولائی 2025 22:20

اسلام آباد (اُردو پوائنٹ اخبارتازہ ترین - اے پی پی۔ 09 جولائی2025ء) وفاقی وزیر برائے انفارمیشن ٹیکنالوجی و ٹیلی کمیونیکیشن شزا فاطمہ خواجہ نے کہا ہے کہ پاکستان کو کیش لیس معیشت بنانا وزیراعظم شہباز شریف کا وژن ہے،ڈیجیٹل ادائیگیوں کا فروغ جدید معیشت کی ضرورت ہے۔انفارمیشن ٹیکنالوجی و ٹیلی کمیونیکیشن سے جاری بیان کے مطابق وفاقی وزیر شزا فاطمہ خواجہ سے سی ای او ایزی پیسہ ڈیجیٹل بینک جہانزیب خان نےملاقات کی۔

ملاقات میں وزیرِاعظم شہباز شریف کے وژن برائے کیش لیس معیشت کی مکمل حمایت کی گئی۔اس موقع پر ڈیجیٹل معیشت کو مضبوط بنانے کے لئے مشترکہ مواقع کا جائزہ لیا گیا۔وفاقی وزیر نے کہا کہ پاکستان کو کیش لیس معیشت بنانا وزیراعظم شہباز شریف کا وژن ہے ،ڈیجیٹل ادائیگیوں کا فروغ جدید معیشت کی ضرورت ہے۔

(جاری ہے)

انہوں نے کہا کہ ایزی پیسہ ڈیجیٹل بینک ڈیجیٹل معیشت میں ایک رہنما ادارہ ہے،ہم سب کے لئے مواقع پیدا کر کے ایک انکلوسیو سوسائٹی کی تشکیل چاہتے ہیں،سمارٹ اسلام آباد منصوبے میں شراکت داری پر مثبت گفتگو ہوئی۔

سی ای او ایزی پیسہ ڈیجیٹل بینک جہانزیب خان نے کہا کہ وزارتِ آئی ٹی کا ڈیجیٹل وژن قابلِ تحسین ہے،ایزی پیسہ ڈیجیٹل بینک پاکستان کا پہلا ڈیجیٹل ریٹیل بینک اور مالیاتی خدمات کی سب سے بڑی ایپ ہے, یہ ڈیجیٹل اور مالیاتی شمولیت میں ایک اہم کردار ادا کر رہا ہے ۔