مقبوضہ کشمیر،13جولائی1931کے شہداء کو خراج عقیدت پیش کرنے کیلئے پوسٹرچسپاں

پوسٹروںمیں لکھا ہے’’کشمیری اپنے شہداء کی عظیم قربانیوں کو ہرگز رائیگاں نہیں جانے دیں گے

جمعرات 10 جولائی 2025 14:33

سری نگر(اُردو پوائنٹ اخبارتازہ ترین - این این آئی۔ 10 جولائی2025ء)بھارت کے غیر قانونی زیر قبضہ جموںوکشمیر میں 13 جولائی 1931 کے شہداء اور حق وانصاف کے حصول کیلئے اپنی جانیں قر بان کرنے والے دیگر شہداء کو خراج عقیدت پیش کرنے کیلئے سرینگر اور دیگر علاقوں میں پوسٹر چسپاں کیے گئے ہیں۔کشمیر میڈیا سروس کے مطابق کنٹرول لائن کے دونوں جانب اور دنیا بھر میں رہنے والے کشمیری ہر سال 13جولائی کو ’’ یوم شہدائے کشمیر‘‘ مناتے ہیں۔

یہ دن ان 22کشمیریوں کی یاد میں منایا جاتا ہے جنہیں ڈوگرہ مہاراجہ ہری سنگھ کے فوجیوں نی1931 میں سنٹرل جیل سرینگر کے باہر گولیاں مار کر شہید کر دیا تھا۔ مختلف آزادی پسند تنظیموں کی طرف سے چسپاں کیے گئے پوسٹروں میں غیر قانونی طور پر جیلوں میں بند حریت رہنمائوں کی تصاویر موجود ہیں۔

(جاری ہے)

پوسٹروںمیں لکھا ہے’’کشمیری اپنے شہداء کی عظیم قربانیوں کو ہرگز رائیگاں نہیں جانے دیں گے اور بھارتی تسلط سے ضرور آزادی حاصل کر کے رہیں گے۔

‘‘پوسٹر وں کے ذریعے لوگوں پر زور دیا گیا کہ وہ 13جولائی بروز اتوار بھر پور ہڑتال کر کے عالمی برادری کو یہ پیغام دیں کہ کشمیری اپنے پیدائشی حق ، خود ارادیت کے حصول تک ہرگز چین سے نہیں بیٹھیں گے۔‘‘پوسٹروںکے ذریعے اقوام متحدہ، اسلامی تعاون تنظیم اور امن پسند ممالک سے بھی اپیل کی گئی ہے کہ وہ نہتے کشمیریوں پر جاری وحشیانہ بھارتی مظالم کا نوٹس لیں اور تنازعہ کشمیر کو اقوام متحدہ کی قراردادں اور کشمیریوں کی خواہشات کے مطابق حل کرانے کیلئے کردار ادا کریں۔

پوسٹرز سماجی رابطوں کی سائٹوں ایکس، فیس بک ، واٹس ایپ وغیرہ پر بھی اپ لوڈ کیے گئے ہیں۔یاد رہے کہ کل جماعتی حریت کانفرنس نے 13جولائی کو’’یوم شہدائے کشمیر‘‘ پر مقبوضہ جموںوکشمیر میںہڑتال اور مزار شہداء نقشبند صاحب سرینگر کی طرف مارچ کی کال دی ہے۔