بھارت دنیا میں تنہائی کا شکار ،ہم نے پلواما کی طرح بھارت کا بیانیہ کامیاب نہیں ہونے دیا، اسحاق ڈار

کابل جا کر چائے پینے ، دہشتگردوں کیلئے سرحد کھولنے سے پاکستان کا نقصان ہوا، ہم روایتی نہیں اقتصادی سفارت کاری پر عمل پیرا ہیں،تقریب سے خطاب

جمعہ 11 جولائی 2025 13:47

بھارت دنیا میں تنہائی کا شکار ،ہم نے پلواما کی طرح بھارت کا بیانیہ کامیاب ..

کوالالمپور(اُردو پوائنٹ اخبارتازہ ترین - این این آئی۔ 11 جولائی2025ء)نائب وزیراعظم اسحق ڈار نے کہا ہے کہ بھارت اب دنیا میں تنہائی کا شکار ہے، پہلگام واقعے کے بعد ہم نے پلواما کی طرح بھارت کا بیانیہ کامیاب نہیں ہونے دیا، واقعے کے چند دن بعد ہی وزیراعظم شہباز شریف نے تحقیقات کی پیشکش کی تھی۔کوالالمپور میں پاکستانی کمیونٹی کی تقریب سے خطاب کرتے ہوئے اسحق ڈار نے کہا کہ بھارت نے سندھ طاس معاہدہ معطل کر کے عجیب حرکت کی، بھارت پر واضح کردیا تھا کہ پاکستان کا پانی روکنا اقدامِ جنگ تصور کیا جائے گا۔

انہوں نے کہا کہ بھارت نہ پاکستان کا پانی روک سکتا ہے اور نہ رخ موڑ سکتا ہے، بھارت کی جانب سے کیے گئے اقدامات پر ہم نے بھرپور جواب دیا، سندھ طاس معاہدے کے معاملے پر ہم نے جواباً بھارتی ایئر لائنز کیلئے حدود بند کیں۔

(جاری ہے)

نائب وزیراعظم نے کہا کہ پاک فضائیہ کے بہادر پائلٹس نے بھارت کے 6 طیارے مار گرائے، مار گرائے جانے والے طیاروں میں سے 4 رفال طیارے تھے، بھارت نے جان بوجھ کر اپنے دو میزائل سکھ آبادی میں گرائے، بھارتی بیانیے کو عالمی سطح پر پذیرائی نہیں ملی۔

اسحاق ڈار نے کہاکہ قومی سلامتی کمیٹی کی میٹنگ میں بھارت کو بھرپور جواب دینے کا فیصلہ ہوا، صبح سوا 8 بجے امریکی وزیر خارجہ نے فون پر کہا بھارت جنگ بندی چاہتا ہے، عسکری سطح پر جنگ بندی برقرار ہے، لگتا ہے بھارت کی سیاسی قیادت کو شکست ہضم نہیں ہو رہی۔اسحق ڈار نے کہا کہ کابل جا کر چائے پینے اور دہشتگردوں کیلئے سرحد کھولنے سے پاکستان کا بہت نقصان ہوا، ہم روایتی نہیں اقتصادی سفارت کاری پر عمل پیرا ہیں۔انہوں نے کہاکہ بیرون ملک مقیم ہر پاکستانی ملک کا سفیر ہے، پاکستان نے مشکل معاشی حالات میں ٹیک آف کیا، 2016 میں پاکستان کی شرح نمو 3.6 فیصد تھی، 2022 میں پاکستان دیوالیہ ہونے کے قریب تھا، پاکستان کو جی 20 میں شامل کرنا ہمارا ہدف ہے۔