ذوالفقار علی بھٹو جونیئر نے نئی سیاسی جماعت بنانے کا اعلان کردیا

ہفتہ 12 جولائی 2025 21:39

لاہور (اُردو پوائنٹ اخبارتازہ ترین - آن لائن۔ 12 جولائی2025ء) ذوالفقار علی بھٹو جونیئر نے نئی سیاسی جماعت بنانے کا اعلان کر دیا۔ پریس کلب میں حقوقِ خلق پارٹی کے رہنماؤں کے ساتھ کسانوں کی زمینوں سے جبری بے دخلی کے خلاف پریس کانفرنس کرتے ہوئے ذوالفقار علی بھٹو جونیئر نے کہا کہ آصف علی زرداری نے جیے بھٹو کا نعرہ کرپشن کو فروغ دینے کے لئے لگایا، کارپوریٹ فارمنگ کسانوں کی زمینوں پر قبضہ کرنے کا منصوبہ ہے۔

(جاری ہے)

انہوں نے کہا کہ پیپلز پارٹی زرداری گروپ، مسلم لیگ ق اور دیگر جماعتیں آج کہاں ہے جو کسانوں کی بات کرتی تھیں۔ پریس کانفرنس میں انہوں نے مزید کہا کہ پنجاب کے محنت کش کسان ملک کی معیشت کی ریڑھ کی ہڈی ہیں، کسانوں کی زمین کو چھیننا ناانصافی ہے۔ کارپوریٹ فارمنگ دراصل زمینوں پر قبضہ کرنے کا منصوبہ ہے۔ ذوالفقار علی بھٹو جونیئر کا کہنا تھا کہ اگر ہمارے سندھ کے کسان بھی پنجاب کی طرح آواز اٹھائیں گے تو ہم اسلام آباد کی طرف لانگ مارچ کا اعلان کریں گے۔ انہوں نے کہا کہ جلد ایک سیاسی جماعت بنانے جا رہا ہوں۔ روٹی، کپڑا اور مکان کے بعد اب بجلی،گیس اور پانی کی بھی عوام کو ضرورت ہے۔