ٴپنجاب اسمبلی میں اپوزیشن ارکان کی معطلی اور ممکنہ نااہلی پر اسپیکر خیبرپختونخوا کا اظہار تشویش

G اسپیکر خیبرپختونخوا اسمبلی نے سپیکر پنجاب اسمبلی کو ارسال کردہ باضابطہ مراسلے میں اس اقدام کو آئینی اختیارات کی غلط تشریح اور جمہوری روایات کے منافی قرار دے دیا

ہفتہ 12 جولائی 2025 22:15

=پشاور(اُردو پوائنٹ اخبارتازہ ترین - آن لائن۔ 12 جولائی2025ء) اسپیکر خیبرپختونخوا اسمبلی بابر سلیم سواتی نے پنجاب اسمبلی میں اپوزیشن بنچوں سے تعلق رکھنے والے چھببیس (26) اراکین کی پندرہ اجلاسوں کے لیے معطلی اور ان کے خلاف آئین کے آرٹیکل 63(2) کے تحت ممکنہ نااہلی کی کارروائیوں پر شدید تحفظات کا اظہار کیا ہے۔ اسپیکر خیبرپختونخوا اسمبلی نے سپیکر پنجاب اسمبلی کو ارسال کردہ ایک باضابطہ مراسلے میں اس اقدام کو آئینی اختیارات کی غلط تشریح اور جمہوری روایات کے منافی قرار دیا ہے۔

اسپیکر خیبرپختونخوا کا کہنا تھا کہ اسمبلی کے اندر نظم و ضبط قائم رکھنے اور قواعد و ضوابط پر عملدرآمد کو یقینی بنانے کے لیے رول 210(3) کا استعمال ضرور اہم ہے، تاہم اگر کسی رکن کے خلاف کارروائی ہو چکی ہو، تو بعد ازاں آئین کے آرٹیکل 63(2) کے تحت نااہلی کی کوشش آئینی حدود سے تجاوز تصور ہوگی۔

(جاری ہے)

انہوں نے متنبہ کیا کہ اس طرح کے اقدامات نہ صرف آئینی شقوں کے غلط استعمال کے مترادف ہیں بلکہ ملک بھر میں قائم دیگر اسمبلیوں کے خودمختارانہ کردار، تقدس اور وقار کو بھی متاثر کر سکتے ہیں۔

اسپیکر نے یاد دہانی کروائی کہ آئین پاکستان کے آرٹیکل 66 اور 69 کو آرٹیکل 127 کے ساتھ ملا کر پڑھا جائے تو یہ واضح ہوتا ہے کہ اراکین اسمبلی کو اسمبلی کی کارروائیوں میں مکمل آئینی تحفظ حاصل ہے اور ان معاملات میں بیرونی مداخلت غیر آئینی ہے۔اپنے خط میں انہوں نے زور دیا کہ اس قسم کے اقدامات آئندہ کے لیے ایک خطرناک نظیر بن سکتے ہیں جو پارلیمانی جمہوریت اور آئینی بالادستی کو نقصان پہنچا سکتے ہیں۔

انہوں نے اپیل کی کہ تمام منتخب نمائندگان اور سیاسی قیادت کو چاہیے کہ وہ تعمیری سوچ، مفاہمانہ رویہ اور تدبر سے کام لیں تاکہ جمہوری اداروں کی ساکھ قائم رہے، سیاسی تقسیم میں کمی آئے اور آئندہ کے لیے مثبت مثال قائم ہو۔اسپیکر بابر سلیم سواتی نے امید ظاہر کی کہ پنجاب اسمبلی میں اختیار کردہ رویے پر ازسرنو غور کیا جائے گا تاکہ جمہوری روایات کو تقویت دی جا سکے۔