بھارت کا یاترا کی آڑ میں فوجی تسلط اور پاکستان مخالف بیانیہ بے نقاب

مودی سرکار نے پہلگام فالس فلیگ کی ہزیمت مٹانے کیلئے مقبوضہ کشمیر میں آپریشن شیوہ کا آغاز کردیا

پیر 14 جولائی 2025 20:10

اسلام آباد (اُردو پوائنٹ اخبارتازہ ترین - این این آئی۔ 14 جولائی2025ء)بھارت کا یاترا کی آڑ میں فوجی تسلط اور پاکستان مخالف بیانیہ بے نقاب ہوگیا جب کہ انسداد دہشتگردی اور احتیاطی سیکیورٹی کے نام پر مودی پاکستان کے خلاف ایک اور سازش میں مصروف ہے۔ رپورٹ کے مطابق مودی سرکار نے پہلگام فالس فلیگ کی ہزیمت مٹانے کے لیے ایک بار پھر مقبوضہ کشمیر میں آپریشن شیوہ کا آغاز کردیا، مودی کی جانب سے فوجی اقدامات انسداد دہشتگردی کیلئے نہیں بلکہ سیاسی جنگ کے ہتھیار ہیں۔

رپورٹ کے مطابق مودی سرکار مذہبی رسومات اور حفاظتی انتظامات کی آڑ میں مقبوضہ کشمیر میں فوجی موجودگی کو جواز فراہم کر رہی ہے، امرناتھ یاترا کو تحفظ فراہم کرنے کیلئے آپریشن شیوہ 2025ء شروع کیا گیا ہے، پاکستان سے کشمیر میں دراندازی روکنے کیلئے 8,500 سے زائد بھارتی فوجی تعینات ہیں ۔

(جاری ہے)

رپورٹ کے مطابق اودھم پور اور کشتواڑ میں حالیہ جھڑپیں عسکری شدت پسندی کی علامت ہیں، راجوری، پونچھ، ڈوڈہ اور کشتواڑ میں40 سے 50 پاکستانی عسکریت پسندوں کی موجودگی کی اطلاعات ہیں۔

رپورٹ کے مطابق آپریشن سندور کے بعد پاکستان نے لائن آف کنٹرول کے ساتھ دہشتگردوں کو دوبارہ تعینات کر دیا ہے۔بھارت فرضی خطرات گھڑ کر پاکستان کو بدنام اور کشمیری مزاحمت کو دہشتگردی ثابت کرنا چاہتا ہے، بھارتی فوج کے مستقل آپریشنز مقبوضہ کشمیر پر زبردستی مسلط ہونے کی علامت ہیں۔ رپورٹ کے مطابق یاترا کی آڑ میں بھارت نے مقبوضہ کشمیر کو مکمل فوجی چھاؤنی میں تبدیل کر دیا ہے۔